Dilemat e aksidentit të Diogo Jotës

Një ditë pas deklaratës së policisë se automjeti me të cilin udhëtonin Diogo Jota dhe vëllai i tij, Andre Silva, lëvizte me shpejtësi të lartë në momentin e aksidentit tragjik, dëshmitarë nga vendi i ngjarjes kanë hedhur poshtë këtë version, duke pohuar se dyshja po qarkullonte brenda normave të lejuara.

Kanë kaluar disa ditë nga vdekja e parakohshme e futbollistit të Liverpool-it, Diogo Jota, dhe vëllait të tij në Zamora të Spanjës, por ende nuk ka një përgjigje përfundimtare mbi shkakun e aksidentit me pasojë fatale. Policia spanjolle deklaroi se mjeti tip Lamborghini Huracan, me të cilin po udhëtonin Jota dhe Silva, lëvizte me shpejtësi të madhe, gjë që sipas tyre bëri të pamundur shmangien e përplasjes.

Por këtë konstatim e kanë kundërshtuar dëshmitarë okularë, të cilët pretendojnë se automjeti nuk po lëvizte me shpejtësi të lartë.

“E di çfarë pashë. Ata kaluan pranë meje me qetësi, pa shpejtësi. Pa shpejtësi. E dërgova vetë videon në CMTV sepse kisha filluar të dëgjoja disa budallallëqe,” tha një prej dëshmitarëve.

Një tjetër dëshmitar shtoi: “Ju jap fjalën time, nuk po shkonin shpejt. Po lëviznin shumë qetësisht. Unë e bëj atë rrugë çdo ditë, nga e hëna në të shtunë, dhe e di mirë se si është. Është një rrugë e errët dhe mund të shihja qartë markën dhe ngjyrën e makinës. Pak më tej, për fat të keq, ndodhi ajo që ndodhi.”

Ky version është mbështetur edhe nga persona të tjerë që ndodheshin në afërsi të vendit të aksidentit.

Hetimet mbi aksidentin vazhdojnë, ndërsa autoritetet pritet të sqarojnë nëse shpejtësia e mjetit ishte vërtet faktori kryesor i tragjedisë.

LEXONI GJITHASHTU:

• Futbollisti i njohur i Liverpool humb jetën në një aksident tragjik në Spanjë
• “Ishe fantastik”- Jurgen Klopp mesazh prekës për vdekjen tragjike të Diogo Jotës