Marine Le Pen kërcënon me votë mosbesimi ndaj kryeministrit Bayrou

Udhëheqësja e fraksionit parlamentar të Tubimit Kombëtar, Marine Le Pen, ka paralajmëruar se do të nisë një votë mosbesimi ndaj kryeministrit francez, François Bayrou, nëse ai nuk e ndryshon planin e tij për uljen e shpenzimeve qeveritare. Në një postim të saj në rrjetin social X, Le Pen e ka cilësuar planin e qeverisë si një “katastrofë” dhe ka kritikuar përpjekjet e Presidentit Emmanuel Macron dhe Bayrou për të adresuar çështjet e deficitit buxhetor.

“Pas shtatë vitesh qeverisjeje katastrofike, Macron dhe Bayrou nuk janë në gjendje të arrijnë kursime reale të kostove dhe po u paraqesin francezëve një projektligj tjetër: gati 20 miliardë euro në taksa dhe zbritje të reduktuara”, ka shkruar Le Pen, duke e akuzuar qeverinë për mungesë masash të efektshme. Ajo ka shtuar se, nëse Bayrou nuk ndryshon kursin e tij, ajo do të iniciojë një votë mosbesimi në parlament.

Një nga kritikat kryesore të Le Pen ishte se plani i kryeministrit nuk përfshin ulje të shpenzimeve për pritjen e emigrantëve dhe nuk ka masa për të ulur kontributet në buxhetin e Bashkimit Evropian, i cili do të rritet me 6 miliardë euro në vitin 2026. Ajo gjithashtu e ka cilësuar të pamjaftueshme mbështetje për bizneset dhe ka kërkuar masa konkrete për të ulur pengesat burokratike për spitalet.

Në anën tjetër, Bayrou ka paraqitur një plan për uljen e shpenzimeve publike si pjesë të përpjekjeve për të adresuar deficitin buxhetor dhe borxhin publik të vendit, i cili ka arritur në 3.3 trilionë euro, ose rreth 114% të PBB-së. Sipas këtij plani, qeveria synon të kursejë 43.8 miliardë euro deri në vitin 2026 për të mbajtur deficitin buxhetor brenda 4.6% të PBB-së, krahasuar me 5.8% që ishte në vitin 2024.