SHBA-të dhe Izraeli dënojnë planin francez për të njohur shtetin palestinez

Franca do ta njohë zyrtarisht shtetin palestinez në shtator, njoftoi mbrëmë Presidenti Emmanuel Macron.

Zyrtarët palestinezë e mirëpritën vendimin, por kryeministri izraelit Benjamin Netanyahu thotë se ky vendim “shpërblen terrorin”, dhe Sekretari i Shtetit i SHBA-së Marco Rubio thotë se ky veprim është “i pamatur”, shkruan BBC.

Macron thotë se ai dhe të tjerët kanë detyrimin të tregojnë se paqja është e mundur dhe se “prioriteti urgjent sot” është t’i jepet fund luftës dhe t’u sjellësh lehtësim popullit të Gazës.

Por, gjithashtu të enjten, negociatorët izraelitë dhe amerikanë vendosën të largohen nga bisedimet e armëpushimit në Gaza në Katar, me Uashingtonin që akuzon Hamasin se nuk “vepron me mirëbesim”. Hamasi thotë se ishte i befasuar nga pretendimi, dhe një burim izraelit këmbënguli se nuk kishte “kolaps” në negociata.

Ndërkohë, kushtet humanitare në Gaza po vazhdojnë të përkeqësohen me shpejtësi. Agjencia palestineze e refugjatëve e OKB-së (UNRWA) paralajmëron se një në pesë fëmijë në Qytetin e Gazës është i kequshqyer – në veri të territorit – dhe se rastet po rriten çdo ditë.

Izraeli dhe Hamasi fajësojnë njëri-tjetrin për situatën, ndërsa agjencitë e ndihmës i kanë bërë thirrje Izraelit të lejojë më shumë ndihma të arrijnë njerëzit në territor, duke paralajmëruar për uri masive.

LEXONI GJITHASHTU:

• Franca do të njohë zyrtarisht shtetin palestinez, Macron njofton hapin historik
• Starmer dhe Macron zbulojnë marrëveshjen e re për emigrantët