Deputet dhe zyrtarë skemë korrupsioni për blerjen e dronëve në Ukrainë, 4 të ndaluar

Organi mbikëqyrës antikorrupsion i Ukrainës njoftoi të shtunën zbulimin e një skeme të madhe korrupsioni që përfshinte kontrata shtetërore për blerjen e dronëve ushtarakë dhe sistemeve të bllokimit të sinjaleve me çmime të fryra.

Në skemë janë përfshirë një deputet në detyrë, dy zyrtarë vendorë dhe disa anëtarë të Gardës Kombëtare, ndërsa katër persona janë arrestuar.

Sipas deklaratës zyrtare të NABU dhe SAPO, thelbi i skemës ishte lidhja e kontratave me kompani furnizimi me çmime të qëllimshëm të fryra, ku autorët merrnin komisione deri në 30% të vlerës së secilës kontratë.

Skandali doli në dritë vetëm dy ditë pas miratimit nga parlamenti ukrainas të ligjit që rikthen pavarësinë e inspektorëve dhe prokurorëve antikorrupsion, duke përfshirë edhe NABU dhe SAPO.

Ky ligj erdhi pas protestave masive kundër vendimit të mëparshëm për t’i vënë këto agjenci nën kontrollin e prokurorit të përgjithshëm, një vendim që shkaktoi trazirat më të mëdha në Ukrainë që nga fillimi i pushtimit rus në 2022.

Presidenti Volodymyr Zelensky, i cili ka kompetenca të gjera në kohë lufte dhe mbështetje të fortë publike, u detyrua të tërhiqej nga vendimi i tij fillestar për të vendosur agjencitë nën kontrollin e prokurorit të përgjithshëm.

Ai e përshkroi këtë ndryshim si përgjigje ndaj “zemërimit të popullit” dhe vetë dorëzoi projektligjin që rikthen pavarësinë e tyre, i cili u miratua të enjten.

Vendimi është mirëpritur nga partnerët evropianë të Ukrainës, të cilët kishin shprehur shqetësime për ndikimin negativ që dobësimi i agjencive antikorrupsion mund të kishte në procesin e integrimit evropian të vendit.

Pas takimit me krerët e NABU dhe SAPO, Zelensky përsëriti angazhimin për luftën kundër korrupsionit: “Është e rëndësishme që institucionet antikorrupsion të veprojnë në mënyrë të pavarur dhe ligji i ri u jep atyre mundësinë për një luftë të vërtetë kundër korrupsionit”, deklaroi ai.