Shqiptari në Itali mban peng ish-gruan dhe fëmijët, lirohen duke bërtitur për ndihmë

Një 53-vjeçar shqiptar është arrestuar nga Karabinierët në Itali, pasi mbante peng ish-bashkëshorten dhe dy fëmijët e tyre të mitur, të moshës 7 dhe 11 vjeç.

Ngjarja ka ndodhur në Peruxhia, ku gruaja dhe fëmijët mbërritën nga Shqipëria më 30 korrik, pasi burri i kishte premtuar se do të siguronte dokumente italiane për fëmijët.

Sipas mediave italiane situata mori një kthesë dramatike sapo gruaja me fëmijët arritën në Itali ku ish-burri i saj u mori pasaportat dhe telefonat celularë asaj dhe dhe fëmijëve, duke i izoluar plotësisht dhe duke penguar çdo mundësi komunikimi apo arratisjeje.

Në një rast, kur gruaja tentoi të largohej për të kërkuar ndihmë, ai e dhunoi fizikisht, duke i shkaktuar lëndime që sipas mjekëve do të kërkojnë rreth dhjetë ditë për t’u shëruar.

Burri, i cili ka precedentë penalë për trafik droge, lidhje kriminale dhe trafik qeniesh njerëzore, i mbajti të izoluar për disa ditë.

Pika e kthesës erdhi kur një i njohur i gruas, i cili nuk kishte më asnjë kontakt me të, njoftoi konsullatën shqiptare.

Kjo e fundit informoi autoritetet italiane, të cilat brenda pak orësh identifikuan vendndodhjen e burrit në zonën e Gubbios.

Karabinierët e ndaluan automjetin që ai po drejtonte, ku në sediljen e pasme ndodheshin gruaja dhe fëmijët, të cilët po kërkonin ndihmë duke bërtitur dhe goditur xhamat e makinës.

Burri u arrestua dhe u dërgua në burgun e Capanne-s. Ndërkohë, gruaja 42-vjeçare dhe fëmijët janë vendosur në një strukturë të sigurt.

Autoritetet gjyqësore pritet të vendosin në ditët në vijim për një seancë dëgjimore provash, për të verifikuar faktet dhe për të vlerësuar rikthimin e mundshëm të viktimave në Shqipëri.