OSBE reagon për Kodin Penal: Nuk kemi qenë të përfshirë në hartimin e ndryshimeve

Prezenca e OSBE-së në Shqipëri ka reaguar në lidhje me ndryshimet e propozuara për Kodin Penal, duke theksuar se nuk ka qenë e përfshirë në hartimin e draftit përkatës.

Në një reagimin për mediat, OSBE shprehet se, megjithëse nuk kanë pasur pjesëmarrje direkte në procesin e ndryshimeve, ata po shqyrtojnë draftin e disponueshëm dhe janë të gatshëm të ofrojnë rekomandime konkrete për qeverinë dhe parlamentin në përputhje me mandatin e tyre për të mbështetur institucionet demokratike dhe shtetin e së drejtës në Shqipëri.

“Prezenca e OSBE-së në Shqipëri thekson rëndësinë e Kodit Penal si një ligj themelor që meriton kohë të mjaftueshme dhe një proces konsultimi të plotë. Megjithëse nuk kemi qenë të përfshirë në hartimin e ndryshimeve të propozuara, ne po shqyrtojmë draftin e disponueshëm dhe jemi të gatshëm t’u ofrojmë rekomandime konkrete qeverisë dhe parlamentit të ri, në përputhje me mandatin tonë për të mbështetur institucionet demokratike dhe shtetin e së drejtës në Shqipëri”, thuhet në reagimin e OSBE-së.

Po ashtu, edhe Delegacioni i Bashkimit Europian në Tiranë ka konfirmuar se nuk ka qenë pjesë e grupit të ekspertëve për hartimin e dispozitave të Kodit Penal, por ka theksuar rëndësinë e një procesi gjithëpërfshirës që duhet të shoqërojë miratimin e tij.

Rezerva mbi këtë draft kanë shprehur disa prej krerëve të institucioneve të drejtësisë, si dhe shoqata të gazetarëve. Po ashtu, Dhoma Kombëtare e Avokatisë ka kundërshtuar ashpër draftin e propozuar për Kodin Penal.

LEXONI GJITHASHTU:

• Kodi i ri Penal: Deri në 3 vite burg kush keqtrajton ose braktis kafshët
• Shoqatat e gazetarëve kundër Kodit të ri Penal: Rrezik për lirinë e fjalës