I dërguari i Trump, Steve Witkoff, viziton Moskën këtë javë

I dërguari i posaçëm i presidentit të SHBA-së, Donald Trump, Steve Witkoff, do të udhëtojë për në Moskë këtë javë, përpara afatit të vendosur nga presidenti amerikan për të bërë përparim në përfundimin e luftës në Ukrainë, që përkon me të premten e ardhshme.

Ky hap vjen në një moment ku Trump ka paralajmëruar për mundësinë e sanksioneve të reja ndaj Rusisë nëse nuk arrihet një marrëveshje për të ndaluar luftën.

Trump njoftoi se Witkoff do të vizitojë Moskën të mërkurën ose të enjten, duke theksuar se mesazhi kryesor që do të dërgohet është një kërkesë për ndalimin e dhunës dhe fundin e luftës, duke shtuar se Rusia duhet të bëjë përpjekje për të shmangur një eskalim të mëtejshëm të tensioneve dhe sanksioneve ndërkombëtare. Kur u pyet për atë që mund të bëjë presidenti rus, Vladimir Putin, për të shmangur këto pasoja, Trump tha: “Po, të arrihet një marrëveshje ku njerëzit të ndalojnë së vrari.”

Në Kiev, autoritetet kanë shprehur skepticizëm për mundësinë e një progresi të madh nga vizita e Witkoff në Moskë. Megjithatë, ka shpresa se retorika më e ashpër dhe qëndrimi më i fuqishëm i Trump ndaj Moskës mund të ndikojnë në një ndryshim të politikës amerikane dhe në mbështetje më të fortë për Ukrainën.

Trump, i cili kishte hyrë në detyrë me bindjen se mund të arrinte një marrëveshje me Putinin, është shprehur gjithnjë e më i frustruar në lidhje me veprimet e vazhdueshme të Rusisë, sidomos sulmet ndaj zonave civile në Ukrainë, të cilat ai i cilësoi si “të neveritshme”.

Të dielën, ai njoftoi se dy nëndetëse bërthamore të komanduar nga ai kishin mbërritur në rajon, pas kërcënimeve të mëparshme nga ish-presidenti rus, Dmitry Medvedev, pa dhënë më shumë detaje.

LEXONI GJITHASHTU:

• Zjarr masiv në Krivyi Rih, Ukraina: Tre viktima dhe dëme të mëdha
• Mbi 180 të vdekur në Gaza në 24 orët e fundit, për shkak të urisë