600 ish-zyrtarë të lartë izraelitë i bëjnë thirrje Trump të ndërhyjë në Gaza

Rreth 600 ish-zyrtarë të lartë të sigurisë izraelite, përfshirë ish-drejtues të Mossad-it, Shin Bet-it dhe Forcave të Mbrojtjes së Izraelit (IDF), i kanë dërguar një letër Presidentit amerikan Donald Trump, duke i kërkuar që të ndërhyjë për të bindur kryeministrin Benjamin Netanyahu që të ndalë luftën në Gaza. Lajmi është raportuar nga “Jerusalem Post”.

Nënshkruesit janë pjesë e grupit “Komandantët për Sigurinë e Izraelit” (CIS), i cili përfshin ish-drejtues të lartë të ushtrisë, shërbimeve të inteligjencës, policisë dhe diplomacisë izraelite. Ky grup është shprehur se situata globale e Izraelit është bërë gjithnjë e më e brishtë për sa i përket legjitimitetit ndërkombëtar.

Në letrën drejtuar Trump-it, CIS thekson se IDF tashmë ka përmbushur dy objektiva kryesore ushtarake në Gaza: “çmontimin e formacioneve ushtarake të Hamasit dhe të strukturës së tij qeverisëse”.

Sipas grupit, objektivi i tretë kthimi i pengjeve mund të arrihet vetëm përmes një marrëveshjeje.

“Ndaloje luftën në Gaza! Në emër të CIS, grupit më të madh izraelit të ish-gjeneralëve të IDF-së dhe të strukturave të tjera të sigurisë, ju bëjmë thirrje të ndërhyni. E keni bërë në Liban, tani është koha ta bëni edhe në Gaza,” shkruhet në letër.

Ata argumentojnë se Hamasi nuk përbën më një kërcënim strategjik për Izraelin dhe se operacionet e mbetura mund të realizohen në mënyrë të targetuar në kohë të mëvonshme. “Pengjet tona nuk mund të presin,” theksohet në mesazh.

CIS gjithashtu i bën thirrje Trump-it të përdorë ndikimin e tij te publiku dhe qeveria izraelite për të ndalur luftën, për të lehtësuar kthimin e pengjeve dhe për të ndihmuar në krijimin e një koalicioni ndërkombëtar që mbështet Autoritetin Palestinez në ndërtimin e një alternative ndaj Hamasit.

Letra vjen në një kohë kur presioni ndërkombëtar ndaj Izraelit për një zgjidhje politike dhe humanitare në Gaza po rritet ndjeshëm.