Trump kërcënon sërish: Nëse BE nuk investon 600 mld $ në SHBA, rikthehen tarifat 35%

Zotimet për investime në kuadër të marrëveshjes tregtare SHBA-BE duhet të përmbushen nga Unioni, ndryshe e presin 35 për qind tarifa.

Paralajmërimi është bërë nga presidenti amerikan Donald Trump, i cili u pyet në një intervistë televizive mbi akordin e arritur më 27 korrik në Skoci me presidenten Ursula von der Leyen.

Trump i mëshoi pozicionit të Uashingtonit, që marrëveshja përfshin një zotim prej 600 miliardë dollarësh nga BE në Shtetet e Bashkuara brenda mandatit të dytë të tij.

“Ky është një investim i ri që i shtohet 100 miliardë dollarëve që kompanitë evropiane investojnë çdo vit në Shtetet e Bashkuara”, ka thënë Trump.

Por Unioni nuk është në gjendje të përcaktojë dhe të implementojë investimet për llogari të sektorit privat. Kuota prej 600 miliardë dollarësh është cilësuar nga Komisioni si një tregues i bazuar në kontaktet e organit ekzekutiv evropian me industrinë.

“Zotimi për investimet ishte një nga arsyet përse u reduktuan tarifat në 15 për qind. Ndaj, nëse nuk përmbushet, tarifat më të larta do të hyjnë sërish në fuqi”, ka thënë Trump.

Të martën Komisioni pezulloi një paketë anti-masash tregtare që vinin në shënjestër vlerën prej 93 milionë euro të produkteve amerikane e që do të hynte në fuqi më 7 gusht.

Aktualisht, Brukseli vazhdon të negociojë një deklaratë që do të formalizonte marrëveshjen e arritur muajin e kaluar në Skoci.

LEXONI GJITHASHTU:

• Zelensky zbardh bisedën telefonike me Trump: Ishte produktive
• SHBA, kryeprokurorja urdhëron hetimin e rivalëve të presidentit Trump