“Miliarda $ po derdhen në SHBA”, Trump njofton hyrjen në fuqi të tarifave të reja

Tarifat e reja gjithëpërfshirëse të Presidentit të SHBA-së, Donald Trump, për më shumë se 90 vende të botës kanë hyrë në fuqi.

“ËSHTË MESNATË!!! MILIARDA DOLLARË NGA TARIFAT PO DERDHEN TANI NË SHTETET E BASHKUARA TË AMERIKËS!”, tha Trump në mediat sociale pak minuta para afatit në Uashington, DC.

Normat variojnë nga 41% për Sirinë, e shkatërruar nga lufta, deri në 10% për Mbretërinë e Bashkuar dhe do të aplikohen përveç tarifave të zakonshme që zbatohen për produktet e importuara në SHBA.

Për shembull, niveli “reciprok” i Brazilit është 10%, por norma totale e tij është 50%, pasi një urdhër ekzekutiv vendosi një taksë shtesë prej 40%, e lidhur me ndjekjen penale të ish-presidentit Jair Bolsonaro.

Bashkimi Evropian është i vetmi partner tregtar ku norma bazë, e vendosur në 15% pas një marrëveshjeje kornizë, përfshin tarifat e mëparshme. Kjo do të thotë se djathërat që normalisht ngarkohen me tarifa importi prej 14.9% do të tatohen me 15%, jo me 29.9%.

Presidentja zvicerane, Karin Keller-Sutter, zhvilloi takime në Uashington me zyrtarë të administratës Trump në përpjekje për të anuluar një taksë prej 39% që surprizoi qeverinë e saj. Qeveria zvicerane ishte gati të mbante një mbledhje të jashtëzakonshme pas kthimit të delegacionit.

Tarifa prej 25% e Indisë mund të rritet në 50%, pasi Trump nënshkroi një urdhër ekzekutiv që vendos taksë shtesë në hakmarrje për blerjen e naftës nga Rusia.

India ka 21 ditë për t’u përgjigjur, ndërsa Trump paralajmëron masa të ngjashme ndaj vendeve të tjera që furnizojnë Rusinë.

Trump prezantoi normat specifike më 2 prill, datë që e quajti “dita e çlirimit”, duke akuzuar botën për plaçkitje ndaj SHBA-së.

Pas pauzave dhe armëpushimeve të ndryshme, grupi i ri i tarifave u konfirmua javën e kaluar.

Disa partnerë tregtarë arritën ulje përmes negociatave, përfshirë Mbretërinë e Bashkuar, Tajlandën, Kamboxhian, Vietnamin, Indonezinë, Filipinet, Japoninë, Korenë e Jugut, Pakistanin dhe Bashkimin Evropian.

Kanadaja u godit me një normë totale prej 35%, ndërsa Meksika mori një zgjatje 90-ditore për të shmangur rritjen e tarifës nga 25%. Kina përballet me një normë prej 30%, ndërsa negociatat vazhdojnë para afatit të 12 gushtit.

Trump paralajmëroi se SHBA do të vendosin tarifë rreth 100% për çipat gjysmëpërçues të importuar nga vendet që nuk prodhojnë në Amerikë ose nuk kanë plane për ta bërë këtë.

Qeveritë globale kanë nxituar për të arritur marrëveshje për të shmangur taksat kufitare, të cilat mund të dekurajojnë investitorët dhe të shkaktojnë humbje të vendeve të punës.

LEXONI GJITHASHTU:

• Hyjnë në fuqi tarifat e reja historike të Trump, cilat vende preken dhe si
• Trump kërcënon sërish: Nëse BE nuk investon 600 mld $ në SHBA, rikthehen tarifat 35%