Kompensimi për pronarët/ Mbi 5 mijë dosje të ekzekutuara, u ndanë 4,2 miliardë lekë

Më shumë se 5800 dosje pronash janë kompensuar në 7 muajt e parë të këtij viti. Sipas Agjencisë së Trajtimit të Pronave, nga janari deri në korrik janë shpërndarë 4,2 miliardë lekë në formën e kompensimit financiar dhe janë dhënë 75,6 hektarë tokë, në formën e kompensimit fizik.

Procesi këtë vit është përshpejtuar, pasi ndryshimet ligjore të bëra vitin e kaluar kërkojnë që brenda 3 viteve, 26 mijë ish-pronarëve që u janë marrë tokat nga regjimi komunist të marrin kompensim.

Kujtojmë se në harkun e 10 viteve, pas vitit 2015 kur u miratua ligji i fundit, janë kompensuar vetëm 870 pronarë ose më pak 5 për qind e totalit të vendimeve të marra.

Ajo që ka vonuar praktikën e kompensimit krahas betejeve të njëpasnjëshme në Gjykatën Kushtetuese kanë qenë edhe numri i ulët i aplikimeve nga ana e qytetarëve si edhe problemet e shfaqura në lidhje me tagrin e prokurave dhe çështje të tjera administrative që kanë penguar përfundimin e procedurave ligjore.

Konkretisht, në 10 vite rezultojnë të jenë depozituar vetëm 2570 kërkesa nga ana e pronarëve të shpronësuar, nga të cilat janë ekzekutuar vetëm 33.8 për qind prej tyre ose 870 vendime.

LEXONI GJITHASHTU:

• Anijet historike mbërrijnë në Amsterdam për edicionin e 10 të festivalit Sail 2025
• Danimarka heq taksën prej 25% për librat, shkak kriza alarmuese e leximit