Çmimi i arit arrin nivel rekord, investitorët kërkojnë siguri

Çmimi i arit ka arritur një nivel rekord pasi kërkesa për këtë metal të çmuar mbetet e fortë mes pasigurisë ekonomike globale.

Çmimi “spot” i arit arriti në 3,508.50 dollarë për ons herët të martën, duke vazhduar trendin në rritje që e ka parë të ngrihet me gati një të tretën këtë vit, shkruan BBC.

Metali i çmuar shihet si një aset më i sigurt për investitorët gjatë kohërave të pasigurisë ekonomike, dhe çmimi i tij u rrit më herët këtë vit pasi presidenti amerikan Donald Trump shpalli tarifa të gjera, të cilat kanë tronditur tregtinë globale.

Analistët thonë se çmimi është ndikuar gjithashtu nga pritshmëritë se banka qendrore e SHBA-ve do të ulë normën kryesore të interesit, duke e bërë arin një perspektivë edhe më tërheqëse për investitorët. Adrian Ash, drejtor i kërkimeve në BullionVault, i tha programit Today të BBC-së se rritja e çmimeve të arit muajt e fundit lidhet drejtpërdrejt me Trump-in dhe “atë që ai i ka bërë gjeopolitikës [dhe] tregtisë globale”.

“Ishte vërtet zgjedhja presidenciale e SHBA-ve vitin e kaluar ajo që i vuri zjarrin tregut”, tha ai.

Analistët përmendin gjithashtu shqetësimet mbi pavarësinë e bankës qendrore të SHBA-së, Rezervës Federale, si një faktor tjetër që nxit çmimin e arit.

Trump ka nisur sulme të përsëritura ndaj kryetarit të Rezervës Federale, Jerome Poëell, dhe së fundmi është përpjekur të shkarkojë njërën nga guvernatoret e saj, Lisa Cook.

Derren Nathan nga Hargreaves Lansdoën tha se ishin “përpjekjet e Trump për të minuar pavarësinë e Bankës së Rezervës Federale” që po “nxisnin interes të ripërtërirë për asetet e sigurta, përfshirë arin”.

Të hënën, kreu i Bankës Qendrore Evropiane, Christine Lagarde, paralajmëroi se nëse Trump do të minonte pavarësinë e Rezervës Federale, kjo do të përfaqësonte një “rrezik shumë serioz” për ekonominë globale.

Ajo tha se nëse Rezerva Federale do të detyrohej t’i përgjigjej politikave të Trump, kjo do të kishte një ndikim “shumë shqetësues” në stabilitetin ekonomik në SHBA, dhe për rrjedhojë edhe në pjesën tjetër të botës.

LEXONI GJITHASHTU:

• Rritet çmimi i arit, arrin në rekorde historike
• Eksperti i tregut imobiliar: Çmimet afër me tregun real, por shitësit presin janarin