Macron kritikon SHBA-në për ndalimin e zyrtarëve palestinezë në konferencën e OKB-së

Presidenti i Francës, Emmanuel Macron, kritikoi vendimin e ShBA-së për të mos u dhënë viza zyrtarëve palestinezë përpara një takimi të nivelit të lartë të OKB-së mbi konfliktin Izrael-Palestinë, duke e quajtur këtë veprim “të papranueshëm”.

“Vendimi amerikan për të mos u dhënë viza zyrtarëve palestinezë është i papranueshëm. Ne bëjmë thirrje që kjo masë të anulohet dhe që përfaqësimi palestinez të sigurohet në përputhje me Marrëveshjen e Vendit Pritës”, tha Macron në një deklaratë pasi bisedoi me Princin e Kurorës Saudite Mohammed bin Salman.

Të dy vendet do të mbajnë një konferencë në Nju Jork për të promovuar një zgjidhje me dy shtete më 22 shtator, një ditë para fillimit të Asamblesë së Përgjithshme.

Duke shkruar në platformën X, Macron bëri thirrje për një “armëpushim të përhershëm, lirimin e të gjithë pengjeve, shpërndarjen në shkallë të gjerë të ndihmës humanitare për popullin e Gazës dhe vendosjen e një misioni stabilizimi në Gaza”.

Ai tha se Franca po punon për të “siguruar që Hamasi të çarmatoset dhe të përjashtohet nga çdo qeverisje e Gazës, që Autoriteti Palestinez të reformohet dhe të forcohet dhe që Rripi i Gazës të rindërtohet plotësisht”.

“Asnjë ofensivë, përpjekje aneksimi apo zhvendosje e detyruar e popullsive nuk do të prishë vrullin që kemi krijuar me Princin e Kurorës – vrull të cilit shumë partnerë i janë bashkuar tashmë”, theksoi ai.

Konferenca, sipas Macron, synon të shërbejë si një “pikë kthese vendimtare” për paqen dhe sigurinë në rajon.

LEXONI GJITHASHTU:

• Izraeli kundër Evropës: Do provoni terrorin në tokën tuaj nëse njihni Palestinën
• ANALIZA/ A është pushtimi i Gaza-s një manovër politike e Netanyahut?