Netanyahu banorëve të Gazës: Largohuni që andej kemi shkatërruar 50 kulla terroriste

Kryeministri izraelit Benjamin Netanyahu u dërgoi një mesazh të prerë banorëve të Gazës të hënën pasdite, duke i paralajmëruar për një ofensivë të afërt tokësore në Qytetin e Gazës.

“U them banorëve të Gazës, shfrytëzoj këtë mundësi dhe më dëgjoni me kujdes: Ju jeni paralajmëruar. Largohuni që andej”, u shpreh Netanyahu në një deklaratë të regjistruar nga dhoma e operacioneve të Forcave Ajrore Izraelite në Tel Aviv.

Ai bëri të ditur se në dy ditët e fundit, ushtria izraelite ka shkatërruar 50 kulla të cilësuara si “kulla terroriste”, duke e quajtur këtë vetëm “një prelud” të një operacioni më të gjerë për të marrë kontrollin e Qytetit të Gazës.

“Ju premtova disa ditë më parë se do të shkatërronim kullat e terrorit të Gazës. Pikërisht këtë po bëjmë. Në dy ditët e fundit, 50 prej këtyre kullave kanë rënë. Forcat ajrore i kanë rrëzuar”, deklaroi Netanyahu.

Ai shtoi se ushtria po përgatitet për një manovër tokësore intensive dhe se operacioni do të fokusohet në eliminimin e të gjitha “foleve të terrorit”.

“Ky është vetëm fillimi”, përfundoi Netanyahu, ndërsa trupat izraelite thuhet se po përqendrohen në zonat përreth Qytetit të Gazës në pritje të urdhrit për ofensivën.

LEXONI GJITHASHTU:

• Sulmi me armë zjarri në Jerusalem, Netanyahu në vendin e ngjarjes
• Mijëra protestues në Izrael ushtrojnë presion mbi Netanyahun për lirimin e pengjeve