Policia britanike arreston tetë tifozë për fyerje raciste ndaj një futbollisti në rrjetet sociale

Policia britanike shoqëroi të premten 12 persona, tetë prej të cilëve i procedoi për fyerje raciste të futbollistëve të Premier-League.

Autoritetet thanë se shoqërimet u bënë në lidhje me përplasjet mes tifozëve të Manchester United dhe Tottenham pas ndeshjes së 11 prillit ku një lojtar i Tottenhamit – emri i të cilit nuk u bë me dije, – u fye rëndë me etiketime raciste në rrjetet sociale.

“Përmes një pune të palodhshme të policisë, personat anonimë pas profileve në rrjetet sociale u identifikuan dhe lokalizuan,” – tha policia.

Arrestimet dhe marrjet në pyetje u zhvilluan në territorin e Anglisë, Uellsit.

Njëmbëdhjetë nga 12 të shoqëruarit ishin të moshës nën 32 vjeç, ndërsa njëri prej tyre 63.

“Me një verë që parashikohet të jetë e ngarkuar me ndeshje futbolli, jemi të përkushtuar për të parandaluar çdo lloj sjelljeje raciste,” – vijoi në njoftimin për shtyp policia britanike.

Klubi i Tottenhamit përshëndeti reagimin e policisë dhe përcolli një mesazh mbështetës për lojtarin e saj koreanojugor Son Heung-min, pavarësisht se nga policia nuk qe konfirmuar se ai ishte futbollisti i fyer nga ana racore.

Another matchday and more abhorrent racial abuse suffered by one of our players. This has again been reported to the platforms and we shall now undertake a full review alongside the Premier League to determine the most effective action moving forward.

We stand with you, Sonny. pic.twitter.com/fNBpSykJJo

— Tottenham Hotspur (@SpursOfficial) April 11, 2021

Muajin e shkuar klubet dhe futbollistët në Britani bojkotuan për katër ditë rrjetet sociale në shenjë proteste ndaj fyerjeve raciste që janë ngritur si problem prej kohësh.

Manchester United përjashtoi përjetësisht nga e drejta për të ndjekur ndeshjet gjashtë tifozë ultras pasi u vërtetua se ata kishin dërguar mesazhe raciste online, ndërsa klubi i Chelsea-it pezulloi për 10 vite një tifoz për mesazhe me përmbajtje antisemitizmi.

LEXONI GJITHASHTU:

• La Liga, Valencia “detyrohet të luajë” pavarësisht pretendimeve për fyerje raciste
• Fyerjet raciste në futbollin anglez nuk kursejnë as Antonio Rudigerin te Chelsea
• Federata angleze e futbollit zotohet të mos tolerojë më fyerjet racore në rrjetet sociale