Von der Leyen mbështet moshën minimale për akses në rrjetet sociale

Presidentja e Komisionit Evropian, Ursula von der Leyen, ka mbështetur thirrjet për një moshë minimale për akses në mediat sociale. Vendet e BE-së si Greqia, Franca dhe Danimarka, siç vëren Politico, kanë bërë presion në muajt e fundit për të vendosur një moshë dixhitale të pjekurisë, duke argumentuar se mediat sociale shkaktojnë dëme tek të miturit.

“Gjithnjë e më shumë vende të Bashkimit Evropian besojnë se ka ardhur koha për të përcaktuar një ‘moshë digjitale të pjekurisë’ për përdorimin e rrjeteve sociale. Dhe duhet të them, si nënë e shtatë fëmijëve dhe gjyshe e pesë nipërve e mbesave, që e ndaj plotësisht këtë qëndrim”, deklaroi ajo gjatë një aktiviteti në Asamblenë e Përgjithshme të Kombeve të Bashkuara në Nju Jork.

Megjithatë, mënyra se si do të zbatohet kjo është objekt debati të nxehtë midis politikëbërësve. Australia ka vendosur një moshë minimale prej 16 vjeç për regjistrimin e llogarive në disa faqe të mediave sociale që nga fundi i vitit. Duke folur së bashku me kryeministrin australian Anthony Albanese, von der Leyen konfirmoi planet për të ngritur një komitet të BE-së që do të “vlerësonte se cilat masa kanë kuptim në nivel evropian”.