Trump shpall tarifa të reja: 100% për ilaçet dhe 25% për kamionët, kur hyjnë në fuqi

Presidenti i Shteteve të Bashkuara, Donald Trump, ka njoftuar një raund të ri tarifash të ashpra ndaj disa mallrave të importuara, me synimin për të mbrojtur prodhimin vendas dhe për të nxitur zhvendosjen e fabrikave në territorin amerikan.

Njoftimi u bë publik përmes një postimi në rrjetin e tij Truth Social, ku Trump theksoi se masat e reja do të hyjnë në fuqi më 1 tetor 2025.

Sipas planit të ri, të gjitha ilaçet e markës dhe ato të patentuara që importohen në SHBA do të përballen me një tarifë prej 100%, përveç rasteve kur kompania importuese është duke ndërtuar ose ka filluar ndërtimin e një fabrike prodhuese brenda SHBA-së.

Sipas Trump, kjo masë ka për qëllim të detyrojë kompanitë farmaceutike të transferojnë kapacitetet e tyre prodhuese në tokën amerikane, në mënyrë që të ulen varësitë nga tregjet e huaja dhe të rritet siguria kombëtare.

Përveç industrisë farmaceutike, masa të reja tarifore do të godasin edhe sektorë të tjerë. Trump njoftoi vendosjen e një tarife prej 25% mbi të gjithë kamionët e rëndë të importuar, duke argumentuar se ky sektor është jetik për infrastrukturën kombëtare dhe për mirëqenien e ekonomisë amerikane.

Ai shtoi se masa do të ndihmojë kompanitë prodhuese amerikane si Peterbilt dhe Kenworth, si dhe Freightliner, të mbrohen nga ajo që ai e quajti “konkurrencë e padrejtë nga jashtë”.

Gjithashtu, tarifat e reja përfshijnë edhe sektorin e mobilieve dhe pajisjeve të shtëpisë. Një tarifë prej 50% do të vendoset për dollapët e kuzhinës dhe lavamanët e banjove, ndërsa mobiljet dhe tapiceritë do të përballen me një tarifë 30%.

Sipas presidentit, këto produkte po “përmbytin tregun amerikan” dhe po dëmtojnë prodhuesit vendas, ndaj është e nevojshme të merren masa të forta për të mbrojtur industrinë kombëtare.

Industria farmaceutike ka reaguar me shqetësim ndaj këtij njoftimi, duke paralajmëruar se tarifat e larta mund të sjellin rritje të çmimeve për ilaçet esenciale dhe të rëndojnë mbi pacientët amerikanë.

Në vitin 2024, SHBA importoi afro 233 miliardë dollarë në produkte farmaceutike dhe medicinale, sipas të dhënave të Byrosë së Regjistrimit të Popullsisë.

Megjithëse Trump nuk ka ofruar një bazë të qartë ligjore për masat e reja tarifore, ai i justifikoi ato me nevojën për të forcuar sigurinë kombëtare dhe për të mbrojtur punëtorët amerikanë.

Sipas tij, tarifat do të nxisin një “rilindje industriale” dhe do të kthejnë prodhimin në vend, një nga premtimet kyçe të tij përpara zgjedhjeve presidenciale të vitit 2024 dhe përpjekjeve të vazhdueshme për një mandat tjetër.

LEXONI GJITHASHTU:

• Turqia heq tarifat ndaj disa produkteve të SHBA-së
• Trump shton një tarifë prej 100 mijë dollarësh për aplikantët e vizave H-1B