1000 € dokumenti, goditet grupi që falsifikonte viza për emigrantët në Shqipëri

Policia e Tiranës ka goditur një rast të falsifikimit të vizave hyrëse në Shqipëri, duke çuar në arrestimin e një 22-vjeçari me origjinë nga Bregu i Fildishtë. Dy persona të tjerë, një shqiptar dhe një tjetër shtetas nga Bregu i Fildishtë, janë vënë nën hetim si bashkëpunëtorë të tij.

Gjatë hetimeve disa javore u dokumentuan shtatë raste, ku vizat e falsifikuara u shiteshin emigrantëve të vendeve të treta kundrejt shumës prej 1000 euro për dokument.

Në pranga ra shtetasi A. T., 22 vjeç, lindur në Bregun e Fildishtë dhe banues në Paskuqan, ndërsa nën hetim janë shtetasi Y. Z., 22 vjeç, lindur në Bregun e Fildishtë dhe banues në Paskuqan, si dhe shtetasi shqiptar A. R., 46 vjeç, banues në Shkodër.

Hetimet vijojnë për të zbardhur në plotësi veprimtarinë kriminale të këtyre personave, ndërsa materialet procedurale i janë referuar Prokurorisë së Tiranës për veprime të mëtejshme.