Vodhën motorin në portin e Durrësit, prangosen dy punonjësit e sigurimit

Dy persona janë vënë në pranga në Durrës pasi kanë vjedhur një motomjet në portin e qytetit. Të arrestuarit ishin në krye të detyrës për të ruajtur portin kur në bashkëpunim me njëri-tjetrin kanë kryer vjedhjen e motorin.

Policia bën me dije se motomjeti kishte vlerë 2500 euro dhe ishte importuar nga Zvicra. Të arrestuarit janë të moshës 45 dhe 47 vjeç, të dy banues në Durrës dhe punonjës në port. Vjedhja ka ndodhur brenda ambienteve të portit.

“Durrës/ Vodhën një motomjet në port, me vlerë 2500 euro; kapen dhe vihen në pranga dy autorët e dyshuar. Dy të arrestuarit ishin me detyrë për ruajtjen dhe sigurimin e objektit të portit. Sekuestrohet motomjeti i importuar nga Zvicra.

Shërbimet e Komisariatit të Policisë Durrës, në vijim të punës për kapjen e personave që shpallen në kërkim dhe për goditjen e veprimtarive kriminale në fushën e vjedhjeve, bazuar në informacionet e siguruara në rrugë operative, lokalizuan, kapën dhe vunë në pranga shtetasit: I. F., 45 vjeç, dhe G. D., 47 vjeç, të dy banues në Durrës.

Këta shtetas, në bashkëpunim me njëri-tjetrin, dyshohet se kanë vjedhur një motomjet të importuar nga Zvicra, me vlerë rreth 2500 euro, në pronësi të shtetasit K. K. Motomjeti është vjedhur brenda ambienteve të portit të Durrësit, ndërkohë që të dy këta shtetas ishin me detyrë funksionale për ruajtjen dhe sigurimin e objektit të portit.

Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme procedurale, për veprën penale “Vjedhja e kryer në bashkëpunim, duke shpërdoruar detyrën,” njofton policia.