Aktakuzë kundër John Bolton, për çfarë akuzohet ish-këshilltari i Trump

John Bolton, i cili shërbeu si këshilltar i sigurisë kombëtare i Donald Trump përpara se të bëhej një kritik i hapur i presidentit, është akuzuar penalisht sipas ligjeve federale.

Departamenti i Drejtësisë ia paraqiti çështjen një jurie të madhe në Merilend të enjten dhe juria zbuloi se kishte prova të mjaftueshme për të paditur Boltonin.

Kjo vjen pasi agjentët e FBI-së bastisën shtëpinë dhe zyrën e Boltonit në gusht, si pjesë e një hetimi mbi trajtimin e informacionit të klasifikuar.

BBC raporton se aktakuza e bën Boltonin, 76 vjeç, kundërshtarin e tretë politik të presidentit amerikan që akuzohet javën e kaluar, pas ish-drejtorit të FBI-së James Comey dhe Prokurores së Përgjithshme të Nju Jorkut, Letitia James.

Bolton ende nuk është prononcuar për aktakuzën, por ka mohuar çdo shkelje. Avokatja e tij, Abby Lowell, tha më parë se Bolton i trajtoi dokumentet siç duhet.

Bolton u shkarkua nga administrata e parë e Trump në vitin 2019. Kujtimet e tij të vitit 2020, “The Room Where It Happened”, në të cilat ai përshkruan punën nën Trump, e portretizon presidentin si të keqinformuar rreth gjeopolitikës dhe vendimet e të cilit u nxitën nga dëshira për rizgjedhje.

Shtëpia e Bardhë ngriti një padi për të ndaluar botimin e librit, duke argumentuar se ai përmbante informacione të klasifikuara dhe nuk ishte verifikuar siç duhet, por gjykata e hodhi poshtë kërkesën dhe libri u botua disa ditë më vonë.

Më pas, Departamenti Amerikan i Drejtësisë hapi një hetim nëse Bolton ka trajtuar në mënyrë të papërshtatshme informacionin e klasifikuar duke publikuar informacione të caktuara në libër. Bolton i ka mohuar të gjitha akuzat.

Trump, nga ana tjetër, e përshkroi Boltonin si “jashtëzakonisht të paaftë” dhe një “gënjeshtar” dhe bëri thirrje për ndjekjen penale të tij.

I pyetur në gusht në lidhje me hetimin ndaj Boltonit, Trump tha se nuk donte të “përfshihej” dhe nuk urdhëroi drejtpërdrejt një kontroll në shtëpinë dhe zyrën e tij, por e quajti Boltonin një “person të lig”.