Takimi “zhgënjyes”, si u tradhtua shpresa e Ukrainës në Shtëpinë e Bardhë

Një fjalë bie në sy në përshkrimin e liderit ukrainas për përpjekjen e tij të fundit me shumë rrezik në zemrën e fuqisë amerikane. Biseda e tij në Shtëpinë e Bardhë me Presidentin Donald Trump, shkroi Volodymyr Zelensky në X, ishte “e drejtpërdrejtë”.

Por nuk na duhet të analizojmë kuptimin e saktë të shkëmbimit për të kuptuar se kjo nuk ishte takimi që pala ukrainase kishte pritur.

Nëse thënia e vjetër britanike që “një javë është kohë e gjatë në politikë” është e vërtetë, atëherë Zelensky duket se ka thyer një rekord të ri.

Një fluturim i shkurtër transatlantik tani duket se është një kohë shumë e gjatë.

Ndërsa niseshin për në Uashington të enjten, pala ukrainase ishte me humor të lartë.

Dëgjoni fjalët e Ruslan Stefanchuk, kryetarit të parlamentit të Ukrainës në thelb njeriu i dytë më i rëndësishëm në vend dhe politikan i përkushtuar fuqishëm ndaj Zelensky-t.

Në një intervistë për BBC pak para se avioni i presidentit të nisej, Stefanchuk e përshkroi udhëtimin si një “moment shumë të rëndësishëm historik”.

Ai tha se takimi do t’i jepte botës siguri të plotë se Trump “më në fund kupton se Putin është gënjeshtar, nuk mund t’i besohet dhe duhet të ndërmerren veprime për të ndalur luftën”.

Dhe, duket se sugjeroi se pyetja kyçe për Ukrainën nëse Trump do të pranojë përdorimin e raketave amerikane me rreze të gjatë Tomahawk ishte pranë zgjidhjes.

Por ndërkohë që avioni i Zelensky-t ishte në ajër, nisën të dalin lajmet për një bisedë telefonike dy e gjysmë orëshe mes Trump dhe Putin, dhe para se rrotat të prekën tokën në pistën e Uashingtonit, u njoftua se një samit tjetër mes tyre ishte në plan.

Ukrainasit zbresën shkallët, por pritën një mirëseardhje të thjeshtë amerikane, dhe optimizmi i tyre u zhduk si një bagazh i humbur rrugës.

Vetëm pak javë më parë, presidenti amerikan dukej se po humbte durimin me Presidentin rus Vladimir Putin, duke sugjeruar se mendonte se po e mashtronte, se sulmet e tij të vazhdueshme ndaj Ukrainës ishin “të çmendura” dhe se po bëhej “shumë i zemëruar” me të.

Por takimi i së premtes konfirmoi se ndjenja e frustrimit kishte zhdukur.

“Mendoj se ai do të bëjë një marrëveshje,” tha Trump, dhe pastaj përsëriti disa nga pikat e tij të vjetra, duke e paraqitur konfliktin, në thelb, si një grindje personale midis dy udhëheqësve.
“Ka shumë urrejtje,” tha ai.

Zelensky ka mësuar nga përvoja e hidhur se ekzistojnë rreziqe të mëdha kur sfidohet Trump brenda mureve të Shtëpisë së Bardhë.

Kështu që tensioni i fshehtë ishte edhe një herë i dukshëm ndërsa Trump, sekretari i tij i shtetit, sekretari i luftës dhe sekretari i thesarit shikonin me seriozitet, ndërsa anëtarë të shquar të medias pro-MAGA  grumbulloheshin pas karriges së tij.

Siç pritej, Zelensky u tregua i kujdesshëm që të shprehte lavdërime të shumta për aftësitë e mikpritësit si njeri i paqes dhe të shprehte vazhdimisht mirënjohjen e tij.

Lëvdatat janë monedha e diplomacisë në Uashington këto ditë.

Por Zelensky gjithashtu la të kuptohej qartë se nuk e ndante bindjen e dukshme të Trump se Rusia po vepron me sinqeritet.

“Ne kuptojmë se Putin nuk është gati,” tha ai.

Rezultati, megjithatë, duket se ishte një përfundim i paracaktuar.

Trump përfundoi ditën duke insistuar se lufta thjesht duhej ngrirë në vijat aktuale të frontit dhe të dyja palët thjesht të “shkonin në shtëpi te familjet e tyre”.

Për Ukrainën dhe aleatët e saj, konflikti nuk është një mosmarrëveshje personale, por një luftë agresioni e hapur nga një shtet autoritar, me ambicie perandorake, kundër një demokracie evropiane.

Ukraina dëshiron raketat Tomahaëk të SHBA për t’i ndihmuar të ushtrojnë presion ndaj Putinit për negociata të sinqerta, dhe dëshiron garanci sigurie nga SHBA për t’u siguruar që ai do të detyrohet të respektojë çdo marrëveshje paqeje të ardhshme.

Zelensky u largua nga Shtëpia e Bardhë pa asnjërën nga këto gjëra.

Çfarë mendojnë ukrainasit për të gjithë këtë?

Në një paraqytet të Kievit, i goditur së fundmi nga dy raketa ruse, bisedova me disa banorë që po punonin ende për të riparuar dëmet në shtëpitë dhe bizneset e tyre.

I kërkova Volodymyr Tsepovatenkos që ende po riparon dritaret që i shpërthyen në dyqanin e vogël që e zotëron mendimin e tij mbi pozicionin e Ukrainës pas takimit të fundit në Shtëpinë e Bardhë.

“Nëse bëjmë një marrëveshje paqeje tani,” më tha ai, “Rusia do të fillojë të përgatitë një luftë të re, më profesionale, kundër Ukrainës, ose ndoshta kundër vendeve të tjera.”

“Unë shoh një rrugë për sigurinë tonë: të shkatërrojmë mundësinë që Rusia të pushtojë ose të luftojë ndonjë vend në Europë.”

Ukraina duhet të vazhdojë të luftojë, tha ai.

Automobili i Oleksandr Vilkos u shkatërrua nga valëzimi i shpërthimit kur raketat goditën. Ai nuk është shumë i shqetësuar, thotë, për vendimin mbi Tomahaëkët.

“E vetmja forcë që vendos se çfarë do të ndodhë më tej është ushtria jonë,” më tha ai.

Ndërsa Ukraina është mirënjohëse për çdo ndihmë të dhënë deri tani, shtoi ai, ishte e drejtë sovrane e Uashingtonit nëse do t’i jepte apo jo Ukrainës raketat e veta me rreze të gjatë për t’u kundërpërgjigjur.

Por me ose pa to, ukrainasit do të vazhdonin të luftonin, tha ai.

“Është gati viti i katërt i luftës me vendin më të madh në botë,” tha ai.

“Dhe megjithatë ne mbijetojmë.”/BBC

LEXONI GJITHASHTU:

• “Paqe pa raketa”,Trump i pret shpresat Zelensky-it për Tomahawk
• Çfarë folën liderët, zbardhen diskutimet Trump-Zelensky në “Shtëpinë e Bardhë”