Sulmi me dronë ukrainas në fabrikën ruse prek prodhimin e gazit në Kazakistan

Një sulm me dronë ukrainas ndaj një fabrike gazi në Orenburg të Rusisë – një nga objektet më të mëdha të këtij lloji në botë – vazhdon të ndikojë në prodhimin e gazit në Kazakistanin fqinj, ndërkohë që Bashkimi Evropian po përgatitet të heqë dorë nga importet e gazit rus deri në fund të vitit 2027.

Sipas Ministrisë së Energjisë së Kazakistanit, sasia e gazit në objektin kazak u pezullua pas sulmit të 19 tetorit – i pari i raportuar ndaj kësaj fabrike, që është pjesë e kompleksit gazo-kimik të Orenburgut, të operuar nga gjigandi shtetëror rus i energjisë, Gazprom.

Agjencia Reuters citoi burime më 20 tetor që thanë se, për shkak të sulmit, prodhimi në fushën kazake Karachaganak ra për 25 deri në 30 për qind. Fabrika përpunon rreth 37.5 miliardë metra kub gaz në vit.

Zyrtarët në Kiev kanë konfirmuar se Ukraina qëndron pas sulmit, të cilin presidenti ukrainas, Volodymyr Zelensky, e përshkroi si dëshmi të “rritjes, si në shtrirje ashtu edhe në saktësi, të sulmeve tona me rreze të gjatë ndaj Rusisë”.

“Pothuajse çdo ditë ose çdo dy ditë, rafineritë e naftës ruse po goditen. Dhe, kjo ndihmon për ta kthyer Rusinë në realitet”, shtoi ai.

LEXONI GJITHASHTU:

• Kallas: Sistemi i mbrojtjes ajrore nga dronët do të jetë funksional brenda dy vitesh
• Zelensky: Dronët dhe raketat ruse po terrorizojnë ende Ukrainën