Zyrtare, Fiorentina shkarkon Stefano Piolin pas 10 javësh pa fitore

Fiorentina ka njoftuar zyrtarisht shkarkimin e trajnerit Stefano Pioli, pas një serie prej 10 ndeshjesh pa fitore në kampionat.

Vendimi erdhi dy ditë pas humbjes 1-0 në shtëpi ndaj Lecce-s, që thelloi edhe më shumë krizën e skuadrës toskane.

Aktualisht, “Viola” renditet në vendin e parafundit në tabelë, me vetëm katër pikë nga katër barazime dhe gjashtë humbje, një situatë që nuk ishte regjistruar prej 83 vitesh në historinë e klubit.

“Fiorentina mund të konfirmojë se Stefano Pioli është liruar nga detyrat e tij si trajner i ekipit të parë,” – thuhet në njoftimin zyrtar të klubit.

“Daniele Galloppa do të marrë përkohësisht drejtimin e ekipit të parë, duke filluar nga seanca stërvitore e kësaj pasditeje.”

Shkarkimi i Piolit vjen vetëm pak ditë pas largimit të drejtorit sportiv Daniele Pradé, me “pëlqim të ndërsjellë”.

Sezon i dështuar dhe fundi i një rikthimi

Pioli, i cili u rikthye në Firenze pas një eksperience të mëparshme me klubin, nuk arriti ta ringjallte skuadrën.

Në 10 javët e para të Serie A-së, Fiorentina nuk ka arritur asnjë fitore dhe aktualisht mban vendin e fundit, me vetëm 4 pikë në total.

Humbja e fundit 0-1 ndaj Lecce-s, me golin e Medon Berishës, ishte pika e fundit për drejtuesit.

Karriera e Piolit dhe situata e Fiorentinës

Gjatë karrierës së tij, Pioli ka drejtuar një sërë klubesh italiane si Parma, Sassuolo, Chievo, Palermo, Bologna, Lazio, Inter dhe Milan, me të cilin fitoi titullin kampion të Serie A në sezonin 2021–2022.

Ai gjithashtu ka qenë trajner i Cristiano Ronaldos te Al-Nassr në Arabinë Saudite përpara se të firmoste me Fiorentinën.

Megjithëse në Evropë Fiorentina ka pasur performanca solide, duke arritur dy finale radhazi të Ligës së Konferencës dhe një gjysmëfinale sezonin e kaluar, rezultatet në kampionat kanë qenë zhgënjyese.

Në Ligën e Konferencës të këtij sezoni, “Viola” kryeson grupin, ndërsa të enjten do të përballet në transfertë me Mainz-in.

Ndeshja e radhës në Serie A do të jetë ndaj Genoas, një duel direkt midis dy ekipeve të fundit në renditje.

Ky është ndryshimi i tretë i trajnerit në Serie A këtë sezon, pas emërimeve të Luciano Spallettit te Juventusi dhe largimit të Patrick Vieiras nga Genoa.