Ronaldo rrëfen vendimin e vështirë për të mos marrë pjesë në funeralin e Diogo Jotas

Cristiano Ronaldo mbrojti vendimin e tij për të mos marrë pjesë në funeralin e Diogo Jotas në një intervistë të kohëve të fundit me Piers Morgan.

Ylli portugez zbuloi arsyet pse nuk i ndërpreu pushimet për të marrë pjesë në funeralin e shokut të tij të ndjerë të ekipit kombëtar portugez ku përmendi premtimin e tij për të mos vizituar më varrezat pas vdekjes së babait të tij dhe dëshirën për të shmangur ceremoni të tilla.

Ronaldo, i cili kishte fituar Ligën e Kombeve me Jotën disa javë më parë, mungonte në funeral dhe u kritikua ashpër në atdheun e tij, pasi u publikuan foto që e tregonin duke pushuar në një jaht në Mallorca.

Ylli 40-vjeçar zbuloi pse vendosi të mos i ndërpriste pushimet dhe të kthehej në Portugali për të bërë homazhe.

Në të njëjtën intervistë, ai konfirmoi se nuk donte që ceremonia të shndërrohej në një “cirk” për shkak të pranisë së tij, ndërsa deklaroi se nuk kishte qenë kurrë në një varrezë që nga humbja e babait të tij, José Dinis Aveiro, rreth 20 vjet më parë.

“Dy gjëra, njerëzit më kritikojnë shumë”, tha fillimisht Ronaldo dhe shtoi: “Siç thashë, nuk më intereson kjo, sepse kur ndjen se ndërgjegjja jote është e mirë, e lirë, nuk ke pse të shqetësohesh për atë që thonë njerëzit. Por një nga gjërat që nuk bëj është se pas vdekjes së babait tim, nuk kam qenë kurrë në një varrim.

Dhe së dyti, e dini reputacionin tim, kudo që shkoj ambienti shndërrohet në një ‘cirk’. Nuk shkoj, sepse nëse shkoj, vëmendja është mbi mua dhe nuk dua atë lloj vëmendjeje”, shpjegoi ai.

“Njerëzit mund të vazhdojnë të më kritikojnë, unë u ndjeva mirë për vendimin tim. Nuk kam nevojë të jem në vijën e parë që njerëzit të më shohin, unë planifikoj gjëra, mendoj për familjen e tij.”

“Nuk kam nevojë të jem para kamerave që njerëzit të shohin se çfarë bëj. E bëj pas kuintave, miku im”, tha “CR7”.

Ronaldo shtoi se pati mundësinë të fliste me familjen e tyre dhe t’u shprehte mbështetjen e tij.

Motra e tij e mbrojti atë. Mungesa e Ronaldos kishte tërhequr kritika të ashpra, me motrën e tij, Katia, që shkroi në Instagram për të mbrojtur vëllain e saj në atë kohë.

Konkretisht, ajo shkroi: “Kur vdiq babai im, përveç dhimbjes së humbjes, na u desh të përballeshim me një vërshim kamerash dhe shikuesish kuriozë në varreza dhe kudo që shkonim… Në asnjë moment ne (fëmijët) nuk ishim në gjendje të largoheshim nga faltorja. Ishte e mundur vetëm në kohën e varrimit, aq e madhe ishte rrëmuja.

Nuk e di kurrë çfarë do të thotë derisa ta provosh. Nëse dikush më dërgon një mesazh duke kritikuar ndonjë gjë që bën vëllai im, do ta bllokoj (do ta injoroj plotësisht), domethënë do ta bëjnë vetëm një herë.”

“Po bëhet lodhëse. Fanatizmi. Kritika për asgjë, e përsëris, asgjë… Shoqëri e sëmurë… Ne të gjithë kemi familje.”

Ronaldo tha se ishte në palestër mëngjesin e vdekjes së Jotës dhe “qau shumë” pasi dëgjoi lajmin tronditës.

Legjenda e Portugalisë tha se ekipi kombëtar ende e ndjen praninë e Jotës në kampet ndërkombëtare, ndërsa i bëri homazh karakterit të shokut të tij të ndjerë të skuadrës.

“Nuk mund ta besoja kur më dërguan mesazhet. Po qaja shumë”, tha Ronaldo, duke shtuar: “Ishte një moment shumë, shumë i vështirë për të gjithë – për vendin, për familjet, për miqtë, për shokët e skuadrës, shumë i trishtueshëm. Lajm shumë, shumë, shumë i trishtueshëm.”

Kujtojmë se 28-vjeçari Jota dhe vëllai i tij 26-vjeçar Andre Silva vdiqën tragjikisht më 3 korrik në një aksident me makinë, ndërsa udhëtonin me Lamborghinin e tyre në një autostradë spanjolle, duke e zhytur komunitetin global të futbollit në zi.

LEXONI GJITHASHTU: 

• Dëshmitarët përgënjeshtrojnë versionin e policisë për aksidentin e Diogo Jotas
• Vdekja e Diogo Jota-s: Liverpool merr vendimin, përjetëson fanellën me numrin 20