Prindërit e gazetarit bjellorus thirrje ndërkombëtarëve për liruar djalin nga burgu

Prindërit e Roman Protasevich, gazetarit bjellorus, i cili u ndalua në Minsk, pas devijimit të detyruar të një fluturimi Ryanair të dielën, i kanë bërë thirrje komunitetit ndërkombëtar të bëjë më shumë për të ndaluar taktikat e “këqija” të Aleksandër Lukashenkos dhe për të shpëtuar djalin e tyre.

Duke folur në një konferencë për shtyp të enjten, prindërit e Protasevich, Natalia dhe Dmitry Protasevich, thanë se ata janë të sigurt që djali i tyre po torturohet dhe u kërkuan udhëheqësve në të gjithë botën të rritnin sanksionet kundër Bjellorusisë dhe të kërkonin lirimin e Roman.

“Është një situatë e tmerrshme në të cilën ne ndodhemi. Gjithçka që ai donte, ishte që të ndihmonte vendin e tij, bashkëqytetarët e tij. Ne kërkojmë mbështetjen tuaj në përhapjen e këtij informacioni”, tha znj. Protasevich.

“Ju mund të shihni në video se si djali im është torturuar”, shtoi ajo.

“Unë e njoh djalin tim. Unë i njoh tiparet e tij. Sigurisht, unë nuk jam një kirurge ose mjeke për të dhënë pretendime të mëdha, por unë mund të shoh nën pundrën që ishte vendosur mbi të. Ndoshta hunda e tij ishte thyer. Ai kishte një shenjë në qafën e tij”, u shpreh ajo më tej.

Për sa janë në dijeni prindërit e Protasevich, gazetarit të ndaluar nuk i lejohet të ketë vizitorë, përfshirë mjekë.

Protasevich, një disident i mërguar dhe kritik i hapur i regjimit të Lukashenkos dhe e dashura e tij, Sofia Sapega, u arrestuan në Minsk pasi aeroplani i tyre u ul në Bjellorusi.

Zyrtarët kanë pohuar se avioni u ul, pasi u dyshua për një sulm me bombë.

Sidoqoftë, asnjë provë nuk është siguruar për të mbështetur atë pretendim dhe udhëheqësit ndërkombëtarë kanë akuzuar Bjellorusinë për kryerjen e një mashtrimi me qëllim për të arrestuar gazetarin.

LEXONI GJITHASHTU:

Në mesin e tensioneve me Perëndimin, Lukashenko takohet me Putin në Rusi

Lukashenko është duke e kthyer Bjellorusinë në Korenë e Veriut të Evropës, thotë liderja e opozitës Tsikhanouskaya

Arrestimi i gazetarit Roman Protasevich, Lukashenko kritikon Perëndimin