Prokuroria e Gjeorgjisë nis hetimet kundër ish-kryeministrit Georgi Gakhari

Prokuroria e Gjeorgjisë nisi procedim penal kundër ish-kryeministrit të vendit, Georgi Gakharia, për ngjarjet gjatë protestave në Tbilisi në vitin 2019 dhe për tejkalimin e dyshuar të kompetencave të tij zyrtare gjatë ngritjes së një pike kontrolli policor në fshatin Chorchana, pranë vijës ndarëse me Osetinë e Jugut, njoftoi kryeprokurori i Gjeorgjisë, Gvaramidze.

Sipas prokurorit, Gaharija akuzohet për organizimin e shkaktimit të lëndimeve të rënda trupore ndaj një numri të madh qytetarësh gjatë demonstratave para ndërtesës së parlamentit më 20 dhe 21 qershor 2019, si dhe për tejkalimin e kompetencave të tij zyrtare ndërsa ishte ministër i brendshëm, raportoi Euronews Georgia.

Gakharia është akuzuar sipas dy neneve të Kodit Penal të Gjeorgjisë, të cilat parashikojnë një dënim deri në 13 vjet burg, dhe prokuroria ka njoftuar se do t’i kërkojë gjykatës së Tbilisit të caktojë paraburgimin si masë sigurie.

Më 7 maj të këtij viti, Gjykata Evropiane e të Drejtave të Njeriut vendosi se kishte një shkelje procedurale të Nenit 3 të Konventës Evropiane për të Drejtat e Njeriut në rastin “20 qershori” dhe urdhëroi Gjeorgjinë të kryente hetime shtesë dhe të vlerësonte përgjegjësinë e personave që planifikuan dhe kryen aksionin policor.

Sipas hetimit, më 20 qershor 2019, Ministri i Brendshëm i atëhershëm, Gaharia, urdhëroi njësitë speciale të përdornin njëkohësisht mjete speciale, përfshirë gaz lotsjellës dhe plumba gome, pa paralajmërim paraprak dhe në kundërshtim me procedurat e përcaktuara, duke mos u lënë protestuesve asnjë mundësi për t’u tërhequr në mënyrë paqësore.

Si pasojë e përdorimit të forcës, dhjetëra qytetarë u plagosën, dy prej të cilëve humbën shikimin dhe pesë pësuan lëndime të rënda fizike.