Parisi përkujton 10-vjetorin e sulmeve të 13 nëntorit me 132 humbje jete

Franca shënon të enjten dhjetëvjetorin e sulmeve terroriste të 13 nëntorit 2015 në Paris, ku humbën jetën 132 persona dhe mbi 400 të tjerë u plagosën.

Sulmet e koordinuara, të kryera nga persona të armatosur, goditën restorante, bare, sallën e koncerteve Bataclan dhe Stade de France, në atë që mbetet ngjarja më e rëndë në territorin francez që nga Lufta e Dytë Botërore.

Aktivitetet përkujtimore do të zhvillohen gjatë gjithë ditës në kryeqytetin francez, me pjesëmarrjen e Presidentit Emmanuel Macron, kryebashkiakes Anne Hidalgo, si dhe familjarëve e miqve të viktimave.

Ceremonitë do të nisin në Stade de France në orën 11:30 me një minutë heshtje, për të vijuar më pas në vendet e tjera të sulmeve:

• 12:30 – te Le Carillon dhe Le Petit Cambodge në arrondissementin e 10-të;

• 13:00–13:50 – në arrondissementin e 11-të, në Bonne Bière, ish-restorantin Comptoir Voltaire dhe Belle Équipe;

• 18:00 – ceremoni përmbyllëse në Jardin du 13-Novembre, një kopsht i ri përkujtimor ku janë gdhendur emrat e 132 viktimave.

Qytetarët janë ftuar të vendosin qirinj e lule në Place de la République, ndërsa Kulla Eiffel do të ndriçohet pas perëndimit të diellit me ngjyrat e flamurit francez, si simbol i unitetit kombëtar.

Gjithashtu, në ndeshjen kualifikuese për Kupën e Botës mes Francës dhe Ukrainës në Parc des Princes, do të mbahet një minutë heshtje në nderim të viktimave të 13 nëntorit.

LEXONI GJITHASHTU:

• Koreja e Jugut ndalon fluturimet, 500 mijë studentë japin provimin për universitet
• Zelensky paralajmëron BE-në: Putin po përgatitet për luftë të madhe në 2029-2030