Trajneri i Anglisë pas ndeshjes me Shqipërinë: Ekipi ishte i vështirë

Trajneri i Anglisë, Thomas Tuchel, ka vlerësuar ekipin kombëtar shqiptar pas sfidës së zhvilluar në Tiranë, ku anglezët triumfuan 0-2 falë dy golave të Harry Kane. Ai u shpreh se përballja ka qenë e ndërlikuar dhe aspak e lehtë, ashtu siç e kishin parashikuar paraprakisht.

“Shqipëria është një skuadër solide. Ka pësuar vetëm pesë gola, katër prej të cilëve ndaj nesh. Ka një stadium modern, një grup cilësor lojtarësh dhe një trajner shumë të mirë. Ekipi ka bërë përparim dhe ka potencial të arrijë më shumë,” tha Tuchel.

Ai shtoi se është i kënaqur që skuadra e tij ruajti portën të paprekur: “Jam shumë i lumtur për faktin që nuk kemi pësuar asnjë gol. Pse jo, mund të takohemi sërish në Kupën e Botës—Shqipëria i ka mundësitë dhe kualitetet për t’u kualifikuar. Goli i parë ishte vendimtar, na dha një epërsi të madhe dhe më pas e kontrolluam ndeshjen deri në fund.”