Përfundimi i mbylljes së qeverisë, reagon Ambasada Amerikane: Forcojmë bashkëpunimin

Ambasada e Shteteve të Bashkuara në Tiranë ka reaguar këtë të hënë pas përfundimit të mbylljes së përkohshme të qeverisë amerikane për shkak të fondeve buxhetore.

“Pas përfundimit të mbylljes së qeverisë, jemi gati të vazhdojmë punën tonë normalisht”, thuhet në njoftimin e ambasadës.

Në të njëjtën deklaratë, ambasada rikujton edhe vizitën e muajit të kaluar të Drejtorit për Çështjet e Europës Perëndimore Qendrore, Mark Fleming.

“Patëm kënaqësinë të mirëprisnim Drejtorin Mark Fleming në Shqipëri”, vijon njoftimi. Sipas ambasadës, gjatë qëndrimit në Tiranë, Fleming u takua me udhëheqës nga i gjithë spektri politik, si dhe me institucione të drejtësisë dhe të zbatimit të ligjit.

Në njoftim theksohet se vizita e tij kishte për qëllim “të nënvizojë partneritetin e fortë SHBA–Shqipëri, të përforcojë gatishmërinë e NATO-s dhe të forcojë bashkëpunimin në goditjen e organizatave kriminale ndërkombëtare.”

Nga ana tjetër në postim shihen pamjet nga takimet e Fleming, me kryetarin e Kuvendit Niko Peleshi, kreun e SPAK Altin Dumani, ministren e Brendshme Albana Koçiu, edhe pjesë nga Grupi Parlamentar i PD-së.