Carlos Alcaraz tërhiqet nga Kupa Davis, shkak problemi në kofshën e djathtë

Pak ditë pas humbjes ndaj Jannik Sinner, Carlos Alcaraz ka shfaqur sërish probleme, duke bërë që spanjolli të mos marrë pjesë në Kupën Davis në Bolonja.

Shkak për këtë vendim është shqetësimi në kofshën e djathtë, për të cilin mjekët i kanë rekomanduar Alcarazit të mos garojë, ndërsa vetë tenisti 22-vjeçar reagoi në rrjetet sociale.

“Më vjen shumë keq të njoftoj se nuk do të jem në gjendje të luaj për Spanjën në Kupën Davis në Bolonjë. Kam shqetësime në muskulin e kofshës së djathtë dhe rekomandimi mjekësor është të mos garoj. Gjithmonë kam thënë se të luash për Spanjën është gjëja më e bukur që ekziston dhe mezi prisja ta ndihmoja ekipin për Kupën Davis. Po kthehem në shtëpi me zemër të thyer,” shkroi Alcaraz.

Sa i përket kompeticionit, Italia do të përballet me Austrinë të mërkurën, ndërsa Spanja do të luajë me Republikën Çeke të enjten në çerekfinale.

Finalja do të zhvillohet të dielën. Në dy edicionet e fundit të Kupës Davis, fituese ka qenë Italia, e cila po ashtu vuan mungesën e Mussetit, që do të zëvendësohet nga Sonego.