Kremlini: Rusia ende nuk ka marrë asgjë zyrtare nga SHBA-të për planin e paqes

Rusia ka deklaruar këtë të premte se ende nuk ka marrë asgjë zyrtare nga SHBA-të mbi planin e saj të paqes. Presidenti ukrainas, Volodymyr Zelensky nga ana tjetër ka deklaruar se është gati të punojë me administratën Trump mbi vizionin e saj për t’i dhënë fund luftës.

Plani amerikan, i publikuar gjerësisht, përfshin propozime që Kievi i kishte përjashtuar më parë, të tilla si lëshimi i zonave të rajonit lindor të Donetskut që ende i kontrollon, zvogëlimi i ushtrisë së saj në madhësi dhe zotimi për të mos u bashkuar me NATO-n.

Këto dispozita duken si shumë të anuara nga Moska dhe morën një përgjigje të formuluar me kujdes nga zyra e Zelensky-t të enjten. Ndërkohë, sulmet ruse vazhdojnë me gjashtë persona të vrarë gjatë natës – pesë në rajonin jugor të Zaporizhzhisë dhe një në rajonin lindor të Dnipropetrovskit.

Draft-plani ka dalë në dritë ndërsa Rusia pretendon përfitime të vogla territoriale në Ukrainën lindore, ndërsa Zelensky përballet me një krizë të brendshme që implikon zyrtarë të lartë në një skandal korrupsioni prej 100 milionë dollarësh.

Shtëpia e Bardhë ka hedhur poshtë pretendimet se Ukraina ishte bllokuar nga hartimi i propozimit, pas takimeve midis të dërguarit të posaçëm të SHBA-së, Steve Witkoff, dhe homologut të tij rus, Kirill Dmitriev.

Zelensky është treguar i kujdesshëm që të mos e kritikojë ose refuzojë publikisht planin, duke thënë se ai vlerësoi përpjekjet e Presidentit Trump dhe ekipit të tij për të rikthyer sigurinë në Evropë ndoshta një mënyrë për ta mbajtur Donald Trumpin në anën tjetër, pavarësisht qasjes së butë të administratës së tij ndaj Rusisë.

Zyra e tij tha se plani sipas vlerësimit të palës amerikane, mund të ndihmojë në rigjallërimin e diplomacisë. Zelensky tha se do t’i diskutojë propozimet me Trumpin në ditët në vijim.

LEXONI GJITHASHTU:

• Qeveria dërgon në Kushtetuese kërkesën për Belinda Ballukun
• Polonia nis operacionin Horizon për të luftuar sabotimet ruse në sistemin hekurudhor