Automjeti del nga rruga në Gjorm të Vlorës, plagosen dy persona

Një aksident i rëndë rrugor ka ndodhur këtë të shtunë në aksin rrugor Kuç – Vlorë, në fshatin Gjorm, ku një makinë ka përfunduar jashtë rruge, ndërsa kanë mbetur të plagosur dy persona.

Aksidenti ndodhi rreth orës 15:10, kur një automjet tip Volkswagen, me drejtues shtetasin M.T., rreth 50 vjeç, dhe pasagjer D.T., 33 vjeç, ka humbur kontrollin e mjetit, dyshohet për shkak të lagështirës në rrugë.

Të dy të plagosurit u transportuan me urgjencë me ambulancë drejt Spitalit Rajonal të Vlorës, ku po marrin ndihmën mjekësore të nevojshme.

Policia ndodhet në vendin e ngjarjes dhe po heton rrethanat e aksidentit për të përcaktuar shkakun e plotë të tij.