Hidhnin në treg euro të falsifikuara, në pranga 4 të rinj në Tiranë

Katër persona janë vënë në pranga nga policia në Tiranë. Të rinjtë u kapën në flagrancë teksa po merrnin një ako në postë ku më pas u zbuluan para të faksifikuara.

Policia bën me dije se të rinjtë vepronin si grup kriminal për hedhjen në treg të kartëmonedhave euro të dyshuara të falsifikuara. Gjithashtu është shpallur në kërkim një person tjetër lidhur me këtë operacion.

“Tiranë/ Finalizohet operacioni policor i koduar “Wrong Delivery”. Bashkëpunonin në formën e një grupi kriminal për hedhjen në treg të kartëmonedhave euro të dyshuara të falsifikuara, vihen në pranga 4 shtetas dhe shpallet në kërkim një tjetër. Sekuestrohen 11 pako që përmbanin kartëmonedha euro të dyshuara të falsifikuara.

Seksioni për Hetimin e Krimit Ekonomik e Financiar në DVP Tiranë, nën drejtimin e Prokurorisë, ka finalizuar operacionin policor të koduar “Wrong Delivery”, me qëllim goditjen e veprimtarisë kriminale të falsifikimit të kartëmonedhave.

Si rezultat i operacionit, u arrestuan në flagrancë shtetasit A. B, 19 vjeç, banues në Shkodër; një i mitur 17 vjeç, banues në Tiranë; S. L, 26 vjeç, banues në Tiranë dhe E. A, 19 vjeç, banues në Tiranë. Gjithashtu, u shpall në kërkim shtetasi A. P, 19 vjeç, banues në Krujë.

Shtetasit S. L., E. A. dhe i mituri u kapën në flagrancë në momentin që po tentonin të tërhiqnin në një postë në Tiranë, 11 pakot që përmbanin kartëmonedha euro të dyshuara të falsifikuara. Këto dërgesa kryheshin nga shtetasi A. B., i cili përdorte një emër tregtar të rremë për të maskuar veprimtarinë dhe për të shpërndarë kartëmonedhat e falsifikuara.

Vijon puna për kapjen e shtetasit të shpallur në kërkim, A. P., si dhe për dokumentimin e plotë të kësaj veprimtarie kriminale. Materialet procedurale i janë referuar Prokurorisë së Tiranës, për veprime të mëtejshme”, njofton policia.

LEXONI GJITHASHTU:

• Reshjet e dëborës zbardhin edhe Librazhdin, akset kryesore të kalueshme
• Përmbytjet dëmtojnë urën e Metoqit, forcat e emergjencave civile në vendngjarje