Media shtetërore siriane: Operacioni izraelit në Sirinë jugore lë 13 të vdekur

Trembëdhjetë njerëz janë vrarë në një operacion izraelit në Sirinë jugore të premten, sipas mediave shtetërore siriane.

Damasku e ka akuzuar Izraelin se kreu “sulm kriminal” në një fshat ku Izraeli tha se trupat e tij u sulmuan me armë zjarri gjatë një operacioni për arrestimin e militantëve.

Ushtria izraelite tha se gjashtë ushtarë u plagosën, tre prej tyre rëndë, nga të shtënat e militantëve gjatë operacionit në fshatin Beit Xhin.

Numri i viktimave sugjeron se operacioni izraelit u shndërrua në një nga më të përgjakshmit që prej rrëzimit të presidentit Bashar al-Assad një vit më parë.

Izraeli e bombardonte shpesh Sirinë kur ajo drejtohej nga Assadi dhe e rriti intensitetin e operacioneve të tij ushtarake në vend pasi ai u rrëzua, duke përmendur synime që përfshinin mbajtjen e militantëve larg kufirit.

Ushtria izraelite tha se trupat e saj kishin ndërmarrë një operacion për të arrestuar persona të dyshuar si anëtarë të Jama’a Islamiya – një grup islamist libanez që shkrepi raketa drejt Izraelit nga Libani gjatë luftës në Gazë – duke i akuzuar ata për përfshirje në “komplote terroriste”.

Ushtria e përshkroi operacionin pjesë të operacioneve rutinë në këtë zonë muajt e fundit.

LEXONI GJITHASHTU:

• Siria: Vizita e Netanyahut në jug të vendit, e paligjshme! Shkelje e sovranitetit
• Siria i bashkohet koalicionit ndërkombëtar të udhëhequr nga SHBA-të kundër ISIS-it