Papa Leo thirrje libanezëve të qëndrojnë në vendin e tyre

Papa Leo XIV i bëri thirrje popullit libanez të qëndrojnë në vendin e tyre teksa shtoi se duhet punuar për të kapërcyer përçarjet e thella politike brenda Libanit. Në një fjalim në pallatin presidencial menjëherë pas mbërritjes së tij në Liban, Papa theksoi situatën e brendshme dhe nevojën që të gjithë të punojnë për paqen.

“Ndonjëherë është më e lehtë të largohesh ose, thjesht, më praktike të shkosh diku tjetër. Vërtet duhet guxim dhe largpamësi për të qëndruar ose për t’u kthyer në vendin tënd”, tha ai në fjalimin e tij të parë drejtuar autoriteteve libaneze.

Kolapsi ekonomik që nga viti 2019 ka përkeqësuar emigrimin masiv nga vendi.

“Ne e dimë se pasiguria, dhuna, varfëria dhe shumë kërcënime të tjera po shkaktojnë këtu, si kudo në botë, një hemorragji (të ikjes) të të rinjve dhe familjeve që kërkojnë një të ardhme diku tjetër, edhe nëse kjo u shkakton dhimbje të madhe braktisjen e atdheut të tyre”, shtoi Leo XIV.

Vendi përjetoi një luftë të gjatë civile (1975-1990), pas së cilës nuk u bë asgjë për të sjellë pajtim të vërtetë. Lufta e fundit me Izraelin i ka thelluar konfliktet, me Hezbollahun që ka një front të hapur kundër Izraelit që nga tetori i vitit 2023 në një shfaqje mbështetjeje për Hamasin palestinez, duke provokuar kundërshtimin e një pjese të madhe të komuniteteve të tjera, përfshirë të krishterët.

LEXONI GJITHASHTU:

• Themeluesi i Dignitas i jep fund jetës përmes vdekjes së asistuar
• Fermerët e Janinës në protestë, qarkullimi për Kakavijë në një rrugë dytësore