Trump do të takohet me zyrtarët e sigurisë kombëtare për çështjen e Venezuelës

Takimi në Zyrën Ovale do të zhvillohet ndërsa Trump po shton presionin ndaj Presidentit Nicolas Maduro me një grumbullim të madh detar në Karaibe dhe paralajmërime ogurzeza për të shmangur hapësirën ajrore të Venezuelës.

“Konfirmoj se presidenti do të takohet me ekipin e tij të sigurisë kombëtare për këtë çështje dhe për shumë të tjera,” tha në një konferencë për shtyp Zëdhënësja e Shtëpisë së Bardhë, Karoline Leavitt.

Leavitt nuk pranoi të thotë nëse Trump do të marrë një vendim përfundimtar pas muajsh tensioni me Karakas, duke theksuar se “sigurisht nuk do të jap detaje specifike të takimit.”

Por ajo nuk e përjashtoi mundësinë e trupave amerikane në tokën venezueliane, duke ruajtur qëndrimin e paqartë të Shtëpisë së Bardhë mbi një ndërhyrje të mundshme ushtarake.

“Ka opsione në dispozicion të presidentit që janë në tryezë, dhe do ta lë atë të flasë për to,” tha Leavitt.

Shtetet e Bashkuara kanë dislokuar aeroplanmbajtësen më të madhe në botë dhe anije të tjera luftarake në rajon, dhe kanë shpallur një kartel të dyshuar droge të drejtuar nga Maduro si organizatë terroriste, ndërsa tensionet me Venezuelën po rriten.

Uashingtoni thotë se synimi i këtij dislokimi ushtarak, i nisur në shtator, është frenimi i trafikut të drogës në rajon, por Karakas këmbëngul se qëllimi përfundimtar është ndryshimi i regjimit.

Trump konfirmoi të dielën se kishte folur së fundmi me Maduron për herë të parë që nga rikthimi në detyrë në janar, por nuk dha detaje.

“Nuk do të thoja se shkoi mirë ose keq. Ishte një telefonatë,” u tha Trump gazetarëve në bordin e Air Force One.

LEXONI GJITHASHTU:

• Zgjedhjet në Honduras në teh të thikës, njeriu i mbështetur nga Trump epërsi e lehtë
• Trump: Hapësira ajrore përreth Venezuelës duhet të mbyllet