Kombëtaret me sytë nga shorti i Botërorit, hidhet pasditen e sotme

Pasditen e kësaj të premte skuadrat e kualifikuara në Kupën e Botës do të njohin kundërshtarët e fazës së grupeve. Deri më tani janë kualifikuar 42 përfaqësuese, ndërsa 6 të tjera do tu bashkohen pas Plej-Ofit.

Uashingtoni pret pasditen e sotme një event tepër të rëndësishëm për Kupën e Botës të vitit të ardhshëm dhe bëhet fjalë për shortin, që do të zbardhë dinamikën e fazës së grupeve, ndërsa 42 skuadrat e kualifikuara deri më tani do të njohin kundërshtarët. Kujtojmë që në këtë kupë bote si asnjëherë më parë do të marrin pjesë 48 e skuadra, 6 të cilat do të kualifikohen pasi të ketë përfunduar faza Play-Off që luhet marsin e 2026-ës, ku një prej pjesëmarrëseve është edhe Shqipëria.

Sa i përket shortit ai do të nisë në orën 18 të pasdites, ku të 48 skuadrat janë të ndara në 4 vazo sipas renditjes së fundit të publikuar nga FIFA në muajin nëntor, duke përfshirë këtu dhe fituesit e mundshëm të Play-Off.

Në total do të jenë 12 grupe me nga 4 skuadra secili, ku në përfundim të kësaj faze do të kalojnë më tej 2 vendet e para të secilit grup dhe 8 ekipet më të mira të vendeve të treta, që janë në total 32 përfaqësuese. Shorti në fjalë pritet me interes të jashtëzakonshëm dhe do të jenë të pranishëm jo vetëm personalitete të futbollit, por dhe sporteve të ndryshme.