U rrëmbyen nga një shkollë, lirohen 100 nxënës në Nigeri

Rreth 100 fëmijë që u rrëmbyen nga një shkollë katolike në Nigerinë qendrore muajin e kaluar janë liruar. Shefi i policisë së shtetit të Nigerit, Adamu Abdullahi Elleman, dhe Peshkopi Bulus Dauwa Yohanna, i cili është përgjegjës për shkollën konfirmuan lirimin e nxënësve.

Ata thanë se Zyra e Këshilltarit të Sigurisë Kombëtare e qeverisë i kishte informuar se fëmijët do të ribashkoheshin me prindërit e tyre nga e hëna. Më shumë se 250 nxënës dhe 12 anëtarë të stafit u rrëmbyen nga shkolla katolike St Mary në Papiri, ngjarja e fundit në një valë rrëmbimesh masive që ka tronditur vendin.

Detajet rreth lirimit të 100 nxënësve të shkollës mbeten të paqarta, duke përfshirë nëse lirimi u sigurua nëpërmjet negociatave apo me forcë, dhe nëse u pagua ndonjë shpërblim.

Guvernatori i shtetit fqinj Nasarawa, Abdullahi Sule tha se qeveria federale kishte luajtur një rol kyç në sigurimin e lirimit të tyre, duke shtuar se përpjekjet prapa skenave nuk mund të zbuloheshin për arsye sigurie.

LEXONI GJITHASHTU:

• Skandal në librat shkollorë në Maqedoninë e Veriut, Kosova quhet Metohi
• Shtatë liderë të BE-së kërkojnë përdorim më të shpejtë të aseteve të ngrira ruse