Ministrja Xhaçka: Raportet Shqipëri-Turqi s’duhet të jenë problem për BE dhe SHBA

Ministrja për Evropën dhe Punët e Jashtme, Olta Xhaçka komentoi marrëdhëniet e Shqipërisë me Turqinë, ndërsa tha se një bashkëpunim i tillë nuk duhet parë si shqetësim nga BE-ja dhe SHBA.

Përballë gazetares Ilva Tare, znj. Xhaçka theksoi se Shqipëria politikën e saj e ka të linjëzuar me atë të BE-së dhe një afrimitet me Turqinë nuk përbën problem, por përkundrazi thotë ajo i jep garanci edhe vetë unionit evropian.

“Jo vetëm që nuk ka qenë, nuk është dhe nuk besoj se do jetë ndonjëherë shqetësim. Turqia është një partner i kyç i BE, ka marrëdhënie të ngushta dhe zhvillon aktivitet le të themi diplomatik shumë të ngushtë me një pjesë të madhe të vendeve evropiane. Është ndoshta partneri më i rëndësishëm i BE. Është vendi që ka statusin e kandidatit me BE, që ka hapur disa kapitujt. Shqipëria ka politikën e vet të linjëzuar me atë të BE 100% është shembull në rajon dhe Turqia në dijeninë time e mbështet plotësisht këtë gjë. Nuk do ta cilësoja kështu, është prioritet strategji i politikës tonë të jashtme dhe veçanërisht i asaj rajonale, zhvillimi i këtyre marrëdhënieve dypalëshe në një nivel më të fortë. Kjo është një marrëdhënie, e cila i jep garanci edhe BE, edhe vetë SHBA”, tha ajo.

Gazetarja Tare e pyeti ministren se çfarë interesash e shtyjnë presidentin e Turqisë, Rexhep Taip Erdogan, që t’i kushtojë kaq shumë rëndësi Shqipërisë, për këtë ministrja Xhaçka dha këtë përgjigje:

“Orientimi ynë është drejt perëndimit, partnerët tanë strategjikë janë ata që janë dhe shumë faleminderit atyre që kanë treguar solidaritet në ditë kaq të vështira të Shqipërisë, është e admirueshme që Turqia mike na është gjendur pranë”, tha Xhaçka.