BE dënon “veprimet e rrezikshme” të rojes bregdetare kineze në Detin e Kinës Jugore

Bashkimi Evropian dënoi të hënën ato që i cilësoi si “veprime të rrezikshme” nga Roja Bregdetare kineze në Detin e Kinës Jugore kundër anijeve peshkare për Filipinet, duke përmendur rrezikun për jetën e civilëve dhe shkeljet e së drejtës ndërkombëtare.

Në një deklaratë, BE-ja tha se përdorimi i topave me ujë dhe prerja e litarëve të ankorimit nga anijet kineze kërcënuan sigurinë e jetës në det, shkaktuan lëndime te civilët dhe minuan ushtrimin e ligjshëm të të drejtave detare.

Blloku rikujtoi se Konventa e Kombeve të Bashkuara për të Drejtën e Detit (UNCLOS) përbën kornizën ligjore që rregullon të gjitha aktivitetet në oqeanet dhe detet e botës dhe duhet të respektohet në çdo kohë.

Ai theksoi gjithashtu se Vendimi i Arbitrazhit i vitit 2016 për Detin e Kinës Jugore është përfundimtar dhe ligjërisht i detyrueshëm për palët e përfshira.

Duke bërë thirrje për uljen e tensioneve, BE-ja i kërkoi Kinës të përmbahet nga përdorimi i forcës ose shtrëngimit dhe t’i zgjidhë mosmarrëveshjet në mënyrë paqësore, në respekt të plotë të së drejtës ndërkombëtare.

Tensionet kanë vazhduar vitet e fundit mes Kinës dhe Filipineve, një aleat i SHBA-së, për shkak të pretendimeve konkurruese në Detin e Kinës Jugore.

LEXONI GJITHASHTU:

• BE kërcënon Belgjikën: Do trajtoheni si Hungaria nëse nuk ndihmoni Ukrainën
• BE forcon kontrollin e investimeve të huaja, Kina nën vëzhgim