Japonia parashikon 18 000 vdekje në rast të një tërmeti të fortë në Tokio

Rreth 18 000 njerëz mund të vdesin në skenarin më të keq nëse Tokio bëhet epiqendra e një tërmeti të madh, i cili ka 70 për qind shanse të ndodhë në 30 vitet e ardhshme, sipas një raporti të qeverisë japoneze të publikuar sot.

Në rast të një tërmeti me magnitudë 7.0 të shkallës Rihter në Tokion jugore, një dridhje e fortë do të ndihet edhe në prefekturat përreth, raporton Japan Times.

Vdekjet pritet të jenë kryesisht në Tokio, Saitama, Chiba dhe Kanaga. Dëmet materiale vlerësohen në rreth 83 trilionë jen (453 miliardë euro) dhe përçarje serioze të funksioneve kryesore të shtetit – politike, administrative dhe ekonomike – me efekte që do të reflektohen në të gjithë botën.

Kjo është hera e parë në 12 vitet e fundit që qeveria ka publikuar një parashikim të tillë. Krahasuar me parashikimin e vitit 2013, ai i ri parashikon më pak vdekje, më pak dëme materiale dhe humbje financiare, pasi kryeqyteti i Japonisë tani është më i përgatitur.

Duke pasur parasysh që shumica e ndërtesave të ministrive ndodhen në pjesën qendrore të Tokios, pritet që puna e qeverisë të jetë e kufizuar përkohësisht.

Raporti shton gjithashtu se nuk ka gjasa që këto ndërtesa të shemben, pasi janë zbatuar masa rezistence ndaj tërmeteve. Shumica e vdekjeve, rreth 12,000, do të shkaktohen nga zjarret, ndërsa rreth 5,300 njerëz do të vriten nga shembja e ndërtesave.

Vlerësimi i dëmeve në lidhje me skenarin më të keq, i cili konsiderohet të ndodhë në një pasdite dimri me një erë të fortë prej rreth 28.8 kilometrash në orë, është se rreth 400,000 ndërtesa do të shkatërroheshin plotësisht, nga të cilat 110,000 direkt për shkak të tërmetit dhe 270,000 për shkak të zjarreve që do të pasonin.

Rreth 8.4 milionë njerëz do të mbeteshin të bllokuar në kryeqytet dhe pezullimi i transportit publik do ta bënte të pamundur kthimin në shtëpi. Turistët dhe biznesmenët mund të përbënin deri në 880,000 njerëz. Qendrat e evakuimit mund të akomodonin deri në 4.8 milionë njerëz dy javë pas tërmetit, përfshirë ata që fillimisht qëndruan në shtëpi, por furnizimet e të cilëve me ushqim dhe gjëra të nevojshme kanë mbaruar.

LEXONI GJITHASHTU:

• SHBA dhe Japonia zhvillojnë stërvitje të përbashkët ajrore pas patrullave Kinë-Rusi
• Tërmeti në Japoni, plagosen 30 persona! Pamje nga lëkundjet e forta (VIDEO)