Marina Franceze sekuestron mbi 4 tonë kokainë në një anije peshkimi në Atlantik

Marina Franceze sekuestroi më shumë se 4 tonë kokainë në një anije peshkimi në Atlantik pranë Antileve dhe pesë persona u arrestuan, njoftoi sot zyra e prokurorit francez.

Njoftimi thotë se anija u ndalua më 14 dhjetor dhe se marina franceze zbuloi 138 balla kokaine me një peshë totale prej 4.2 tonësh, raportoi Figaro.

Theksohet se bashkëpunimi i shërbimeve franceze dhe greke çoi në arrestimin në Atlantik të pesë personave të dyshuar si anëtarë të një organizate kriminale që kontrabandon kokainë, përfshirë edhe kreun e rrjetit.

Pas këtij operacioni, sasia totale e narkotikëve të sekuestruar nga Marina Franceze në zonën detare të Karaibeve këtë vit u rrit në më shumë se 35.7 tonë. 28 tonë drogë u sekuestruan në Karaibe vitin e kaluar.