Cikalleshi pranë Flamurtarit, bisedime që ndezin shpresat në Vlorë

Për rreth tre orë, futbollisti i Kombëtares shqiptare Sokol Cikalleshi dhe presidenti i Flamurtarit, Sinan Idrizi, kanë qëndruar “të ngujuar” në stadiumin “Flamurtari”, në një takim që ka ngjallur interes të madh te tifozët vlonjatë.

Mesa duket, Cikalleshi është shumë pranë një aventure të re me skuadrën e Flamurtarit, duke sinjalizuar një rikthim të bujshëm në futbollin shqiptar. Sulmuesi 34-vjeçar aktualisht aktivizohet në Turqi, në Ligën e Parë, por negociatat e zhvilluara në Vlorë lënë të kuptohet se një marrëveshje mund të konkretizohet gjatë merkatos së janarit.

Flamurtari synon të bëjë një goditje të madhe në këtë merkato dimërore, ndërsa afrimi i një emri si Sokol Cikalleshi do të ishte një përforcim me peshë dhe një sinjal i qartë për objektivat ambicioze të klubit në vazhdim.