Aksidentohet kamioni në Malësinë e Madhe, plagosen dy persona

Një aksident është regjistruar pasditen e kësaj të premte në fshatin Rrjoll në Malësinë e Madhe. Policia njofton se rreth orës 16:00 një kamion ka humbur kontrollin dhe ka dalë nga rruga. Si pasojë kamioni është rrëzuar duke plagosur 2 persona.

Shoferi dhe pasagjeri i plagosur janë dërguar në spitalin e Shkodrës ku kanë marrë ndihmën mjekësore. Fatmirësisht ata janë jashtë rrezikut për jetën.

“Malësi e Madhe / Informacion paraprak. Rreth orës 16:00, në fshatin Rrjoll, Malësi e Madhe, shtetasi N. P., duke drejtuar një automjet tip kamion, ka humbur kontrollin mbi drejtimin e automjetit dhe, si pasojë automjeti ka dalë nga rruga dhe është rrëzuar.

Si pasojë e aksidentit, është dëmtuar drejtuesi i kamionit, shtetasi N. P., si dhe pasagjeri G. P., të cilët ndodhen në Spitalin Rajonal Shkodër, jashtë rrezikut për jetën. Grupi hetimor po punon për sqarimin e rrethanave të aksidentit”, njofton policia.