Mbi 3000 migrantë humbën jetën për të arritur në Spanjë në vitin 2025

Më shumë se 3,000 persona humbën jetën gjatë përpjekjeve për të arritur në Spanjë përgjatë vitit 2025, bëri të ditur të hënën organizata joqeveritare Caminando Fronteras.

Sipas raportit të saj vjetor, “Monitorimi i së Drejtës për Jetë 2025”, gjithsej 3,090 migrantë vdiqën këtë vit në rrugët detare drejt Spanjës. Nga këto viktima, 192 ishin gra dhe 437 ishin të mitur. OJQ-ja thekson një rritje të ndjeshme të vdekjeve në itinerarin nga Algjeria drejt Ishujve Balearik.

Caminando Fronteras kujtoi se në vitin 2024 u regjistrua një rekord prej mbi 10,000 vdekjesh në det gjatë përpjekjeve për të arritur në Spanjë. Ndërkohë, shifrat e vitit 2025 pasqyrojnë një rënie të mbërritjeve të migrantëve nga Afrika e Veriut, veçanërisht drejt Ishujve Kanarie, një nga rrugët më vdekjeprurëse për migrantët që synojnë Bashkimin Evropian.

Sipas të dhënave të Ministrisë së Brendshme spanjolle, deri më 15 dhjetor, mbërritjet e parregullta të migrantëve ranë me 40.4% krahasuar me vitin 2024. Rënia ishte edhe më e theksuar në Ishujt Kanarie, ku u shënua një ulje prej 59.9%.

Në total, gjatë vitit u raportuan 303 tragjedi detare, prej të cilave 121 ndodhën në itinerarin midis Algjerisë dhe Ishujve Balearik, veçanërisht drejt Ibizës dhe Formenterës, rruga që ka pasur trafikun më të madh të anijeve gjatë këtij viti.