Akuzat për Agasin, Manja i përgjigjet Berishës: Thashetheme pazari

Ish-ministri i Drejtësisë, Ulsi Manja i është kundërpërgjigjur kreut të Partisë Demokratike, Sali Berisha, i cili në foltore tha se Ergys Agasi i shpallur në kërkim nga SPAK për disa vepra penale, e kishte goditur me grushte Manjën.

Në një postim në rrjetet sociale, Manja i cilëson pretendimet e kreut të PD-së, si shpifje të rëndomta.

“Sali, ktheje dhimbjen në forcë!Më thanë që më kishe qarë hallin dje në foltoren tënde buzë trotuarit. Të mirëkuptoj, Sali: kur më shumë lajm bën emri im dhe ty s’të ngjit më fjala, ke leje ta përdorësh emrin tim sa herë të duash.Për shpifje të rëndomta si kjo e “grushtave”, për përralla dimri, thashetheme pazari e kafenesh, për çfarëdo që t’i vijë mbarë moshës tënde!

Nëse emri im të ndihmon të bësh lajm më shumë se Ervin Salianji, përdore emrin tim, se si i thonë fjalës, një rrugë e dy punë: ti tretesh çdo ditë e më shumë politikisht, ndërsa mua më shton ndjekësit në politikë”, shkruan Manja.