Mbështetja e Trump dhe e Netanyahut ndaj protestave, Irani: Janë një kërcënim, ne do të përgjigjemi

Irani në një reagim ka theksuar se i konsideron si një kërcënim deklaratat e presidentit të SHBA-së Donald Trump dhe kryeministrit izraelit, Benjamin Netanyahu në lidhje me protestat që po zhvillohen në vend.

Kreu i ushtrisë iraniane, Amir Khatami tha se nuk do të tolerojnë që kjo të vazhdojë pa u përgjigjur.

“Irani Islamik e konsideron përshkallëzimin e retorikës armiqësore kundër kombit iranian një kërcënim dhe nuk do ta tolerojë këtë të vazhdojë pa iu përgjigjur”, tha gjenerali Khatami.

Sipas tij nëse armiku bën një gabim, Irani do të përgjigjet me më shumë vendosmëri sesa gjatë luftës 12-ditore në qershor kundër Izraelit dhe Shteteve të Bashkuara.

Trump ka kërcënuar ditët e fundit të ndërhyjë ushtarakisht në Iran nëse vriten protestues, ndërsa Netanyahu u ka ofruar protestuesve mbështetjen e tij .

“Po e ndjekim nga afër. Nëse fillojnë të vrasin njerëz, siç kanë bërë në të kaluarën, mendoj se do të goditen shumë rëndë nga Shtetet e Bashkuara”, tha presidenti amerikan të dielën.

Të hënën, diplomacia iraniane njoftoi se deklaratat e Trump dhe Netanyahu përbënin nxitje për dhunë dhe akuzoi Izraelin se po kërkon të minojë unitetin kombëtar.