Masakra e sheshit “Tiananmen”, policia arreston organizatoren e eventit përkujtimor të ngjarjes

Aktivistja pro-demokracisë Chow Hang Tung është arrestuar nga policia e Hong-Kongut në 32-vjetorin e masakrës së sheshit “Tiananmen”.

Chow është nënkryetare e Aleancës për Hong-Kongun, që organizon vigjilje vjetore për viktimat e ofensivës brutale të regjimit ndaj aktivistëve pro-demokracisë.

Ajo u arrestua për promovimin e një grumbullimi të paautorizuar.

Gjithçka ndodh teksa autoritetet në ish-koloninë britanike kanë ndaluar përkujtimin e ngjarjes për të dytin vit rresht, me argumentin për kujdes nga coronavirusi.

Policia ka mbyllur gjithashtu parkun “Viktoria”, ku qytetarët mblidhen çdo vit për të shënuar përvjetorin dhe disa mijëra oficerë janë vendosur në gjendje gatishmërie për të ndalur çdo përpjekje për të përkujtuar eventin.

Hong-Kongu dhe Makau janë të vetmet vende në territorin kinez ku njerëzit mund të kujtojnë ofensivën fatale të regjimit ndaj protestuesve pro-demokracisë.

Por këtë vit edhe autoritetet në Makau ndaluan vigjiljen, duke deklaruar se mbajtja e saj shkel ligjet e vendit.