SHBA sekuestron një tjetër tanker, tentoi të thyejë bllokadën detare ndaj Venezuelës

Uashingtoni njoftoi të premten se ka sekuestruar një tjetër anije cisternë që tentoi të thyejë bllokadën detare amerikane, e cila synon të parandalojë anijet e sanksionuara të hyjnë ose të largohen nga Venezuela. Kjo është anija e pestë e tillë e sekuestruar nga autoritetet amerikane gjatë javëve të fundit.

Shtetet e Bashkuara kanë dislokuar një forcë të konsiderueshme detare në rajonin e Karaibeve, në kuadër të operacioneve kundër trafikut të drogës, sekuestrimit të anijeve cisternë dhe veprimeve të shpejta që, sipas autoriteteve, synojnë rritjen e presionit ndaj regjimit të presidentit venezuelian Nicolás Maduro.

Anija e fundit e sekuestruar, e identifikuar si Olina, dyshohet se është pjesë e të ashtuquajturës “flotë fantazmë”, e përdorur për transportimin e naftës së embargos. Sekretarja amerikane e Sigurisë Kombëtare, Kristi Noem, deklaroi se anija ishte nisur nga Venezuela dhe kishte tentuar t’u shmangej forcave amerikane.

“Flotat fantazmë nuk do t’i shpëtojnë drejtësisë. Ato nuk do të fshihen pas pretendimeve të rreme të kombësisë,” shkroi Noem në një postim në rrjetin social X, duke konfirmuar se sekuestrimi është kryer nga Roja Bregdetare e Shteteve të Bashkuara.

Autoritetet amerikane theksojnë se operacionet detare do të vijojnë, si pjesë e zbatimit të sanksioneve dhe përpjekjeve për të ndaluar aktivitetet e paligjshme në rajon.