“Kolonia e pikturës në Vlorë”, çelet ekspozita me peizazhe e disa prej piktorëve më të njohur vendas

Njëzetekatër piktorë nga vendi u mblodhën në Vlorë në “koloninë” e radhës të pikturës, në kujdesin e arkitektit Piro Stefa. Pas pesë ditësh punë krijuese, këtë fundjavë u çel ekspozita me punimet e tyre. Gjashtëdhjetë punime kanë firmën e personaliteteve të pikturës shqiptare që nga mjeshtërit Buron Kaceli, Ardian Devolli si dhe i mirënjohuri Kujtim Buzi e deri te Edi Kojani.

Peizazhi zotëroi punimet, ndërsa binte në sy larmia e ngjyrave. Për mjeshtrin Kaceli, Vlora nuk është vetëm natyrë frymëzuese por dhe mikpritëse. 

“Kam qene në dy kolonitë e para. Janë 60 piktura të ekspozuara, motive po kryesisht peizazhe. Pesë ditë shumë të bukura. Natyra e Vlorës por edhe mikpritja të cilën e ndiem shumë si edhe interesin për pikturën çka na jepte shumë kënaqësi dhe na bënte të punonim më fort,” – tha piktori Buron Kaceli.

Edi Kojani piktori vlonjat pjesëmarrës në të gjitha kolonitë thotë se prezantohet me tre peizazhe nga fshati Nartë, një lagje e vjetër e Vlorës dhe ishullin e Sazanit.

“Gjithmonë jam pjesë e kolonive, shkojmë në vende të ndryshme sëbashku me kolegë të tjerë dhe pikturojmë. Në këtë prezantim kam dy peizazhe, një nga Narta dhe një nga rrugicat e njohura si “Sheshi i Kateqit” dhe pastaj mendova Sazanin që për mua është monument për nga bukuria dhe madhështia. Piktura duhet të luaj me ngjyrat atje e ka bukurinë,” – tha Kojani.

Piktorja nga Durrësi Marjana Goxhabelliu thotë se ka punuar fort me ngjyrat për të theksuar ndryshimet në infrastrukturën e Vlorës.

“Është hera e katërt që marr pjesë në Koloninë e piktorëve. Jam me tre punë, kam përdorur  dy ngjyra, ngjyrën bojë qielli të detit dhe jeshilen e malit duke prezantuar kaosin që ka qenë Vlora dhe duke shkuar  drejt parajsës gjësë më të bukur që unë e adhuroj Vorën e cila bëhet gjithmonë më e bukur. Po ta shohësh po shkojmë drejt sistemimit po i qëndisim qytetet dhe kjo më frymëzon,” – u shpreh Goxhabelliu.

Për organizatorin, arkitektin Piro Stefa është kënaqësi të bashkëpunosh me pesha të rënda sipas tij, të artit vizual shqiptar.

“Kemi që prej [vitit] 2010 që e organizojmë këtë, gati çdo dy vjet ne organizojmë kolonia e artistëve shqiptar. Këtë vit për arsye të Covidit e kemi reduktuar vetëm për artistë brenda Shqipërisë, 24 piktorë janë sivjet, janë të ekspozuara 60 punë. Këtu mund të shikosh individualitete, aromë Vlore një dashuri të madhe, dhe e bërë në prag të sezonit është një mesazh që ta duam më shumë Vlorën, të krijojmë një mundësi që ky qytet te behët një epiqendër e madhe e turizmit shqiptar,” – thotë Stefa.